Við tollafgreiðslu sendinga á degi hverjum skal ákvörðun tollverðs í tollskýrslum byggð á tollafgreiðslugengi eins og opinbert viðmiðunargengi er skráð af Seðlabanka Íslands síðasta mánudag á undan.

Gengið sem Seðlabanki skráir á hverjum mánudegi gildir frá og með þriðjudeginum eftir og til og með næsta mánudegi.

Þegar helgidag eða almennan frídag ber upp á mánudag skal miða tollafgreiðslugengi við opinbert viðmiðunargengi næsta virka dags á undan.

Sérregla um útflutning

Við útflutning skal nota tollafgreiðslugengi á brottfarardegi flutningsfars ef tollskýrsla er gerð og tollafgreidd eftir brottfarardag.

Í hraðflutningum og bráðabirgðatollafgreiðslu

Við afgreiðslu hraðflutninga og bráðabirgðatollafgreiðslu skal miða við tollskrá og gengi á þeirri dagsetningu sem fram kemur í sendingarnúmeri (komudaginn) þegar skýrslan er afgreidd.