Kæra

Tollskyldur aðili getur, samkvæmt 117. grein tollalaga 88/2005, kært ákvörðun tollyfirvalda um:

• gjaldskyldu

• fjárhæð innflutningsgjalda (aðflutningsgjalda)

• eða atriði sem liggja til grundvallar ákvörðun innflutningsgjalda

Kærufrestur

Ef ágreiningurinn er um vöru sem þegar hefur verið tollafgreidd er kærufresturinn 60 dagar frá tollafgreiðsludegi.

Kærur sendist annað hvort með pósti eða á netfangið upplysingar@skatturinn.is.
Hægt er að nota eftirfarandi eyðublað fyrir kærur, en það er ekki nauðsynlegt.

Úrskurður

Tollyfirvöld skulu úrskurða innan 30 daga frá því að gagnaöflun er lokið.

Úrskurðinn skal senda til innflytjanda með sannanlegum hætti.

Úrskurðurinn verður að vera rökstuddur og koma þarf fram hvort heimilt sé að kæra úrskurðinn til yfirskattanefndar samkvæmt 118. grein tollalaganna eða til fjármálaráðherra.

Yfirskattanefnd er æðsti úrskurðaraðili á stjórnsýslustigi í skattamálum og tollamálum. Yfirskattanefnd er sérstök stofnun og óháð skatt- og tollyfirvöldum og fjármálaráðherra í störfum sínum. Um yfirskattanefnd gilda lög nr. 30/1992, um yfirskattanefnd.

Kæra

Tollskyldum aðila er heimilt samkvæmt 118. gr. tollalaga nr. 88/2005 að skjóta ákveðnum ákvörðunum og úrskurðum tollyfirvalda til yfirskattanefndar.

Á þetta við um:

• endurákvörðun samkvæmt 111.-113. grein, samanber 114. grein.

• úrskurði tollyfirvalda um leiðréttingu samkvæmt 116. grein.

• kæruúrskurði samkvæmt 117. grein.

• ákvörðun tollyfirvalda samkvæmt 21. grein og 2. málsgrein 145. greinar tollalaga.

Eyðublað og nánari upplýsingar um kærur til yfirskattanefndar.

Kærufrestur

Kærufrestur til yfirskattanefndar er 3 mánuðir frá póstlagningu ákvörðunar eða úrskurðar tollyfirvalda sem skjóta má til nefndarinnar.

Um málsmeðferð fyrir yfirskattanefnd fer að öðru leyti eftir lögum númer 30/1992, um yfirskattanefnd.

Varðandi önnur mál sem ofangreind lagaákvæði ná ekki yfir, til dæmis:

• veitingu leyfa til tollmiðlunar eða tollvörugeymslu

• ákvarðanir um synjun eða stöðvun á tollafgreiðslu og fleira

þá fer um málsmeðferð þeirra eftir almennum kæruheimildum VII. kafla stjórnsýslulaga númer 37/1993.

Samkvæmt stjórnsýslulögum er heimilt að kæra stjórnsýsluákvörðun til æðra stjórnvalds til þess að fella hana úr gildi eða fá henni breytt.

Kærufrestur

Slík kæra skal borin fram innan 3 mánaða frá því að aðila máls var tilkynnt um stjórnsýsluákvörðun nema lög mæli á annan veg.

Ef ekki má skjóta ákvörðunum tollyfirvalda til yfirskattanefndar er heimilt skv. 26. gr. stjórnsýslulaga að skjóta ákvörðun til æðra stjórnvalds sem í tilfelli tollyfirvalda er fjármálaráðherra. Um slík mál gilda almennar málsmeðferðarreglur og kærufrestir stjórnsýslulaga.

Úrskurður yfirskattanefndar er fullnaðarúrskurður á stjórnsýslustigi.

Málskot til almennra dómstóla um úrlausnarefni sem farið hefur fyrir nefndina frestar ekki eða breytir niðurstöðu hennar fyrr en dómur er genginn samanber 11. málsgrein 118. greinar tollalaga.

Ávallt er heimilt að fara með mál strax fyrir dómstóla. Ekkert ákvæði er í tollalögum eða öðrum sérlögum sem skerðir þann rétt eða kveður á um tæmingu kæruleiða innan stjórnsýslunnar áður en leitað er til dómstóla. Getur slík leið verið heppileg meðal annars þegar um er að ræða heimildir tollgæslu til leitar, handtöku eða haldlagningar. Lög númer 19/1991 um meðferð opinberra mála gilda um öll slík mál.

Umboðsmaður Alþingis hefur heimild til þess að skoða meðferð mála einstakra aðila hjá tollyfirvöldum.

• Aðilar geta óskað eftir þessu við umboðsmann Alþingis.

• Hann getur þó einnig tekið mál upp sjálfur.

Hlutverk umboðsmanns er að hafa í umboði Alþingis eftirlit með stjórnsýslu ríkis og sveitarfélaga á þann hátt sem nánar greinir í lögum nr. 85/1997 um umboðsmann Alþingis og tryggja rétt borgaranna gagnvart stjórnvöldum landsins.

Kvörtun getur hver sá borið upp sem telur stjórnvald hafa beitt sig rangindum.
Kvörtun til umboðsmanns skal:

• vera skrifleg og öll tiltæk sönnunargögn um málsatvik skulu fylgja.

• bera fram innan árs frá því að stjórnsýsluákvörðunin var tekin sem um ræðir.

Ef skjóta má máli til æðra stjórnvalds er ekki hægt að kvarta til umboðsmanns fyrr en æðra stjórnvald hefur fellt úrskurð sinn í málinu. Fresturinn telst þá frá þeim tíma.