Í dag er deildin að notast við fjórar vélar þar sem ein vélin er tvísetin og því eru fimm skjólstæðingar sem koma á deildina þessa dagana, þrisvar sinnum í viku allan ársins hring, þeir eru í vélinni allt frá 2. upp í 4. klukkustundir og því má sjá að viðveran hjá okkar fólki er mikil.
Það má segja að deildin sé nokkurs konar útibú frá blóðskilunardeild LSH en þessir skjólstæðingar eiga sína nýrnalækna þar og þeir stýra meðferðum þeirra. Teknar eru blóðprufur með reglulegu millibili hjá skjólstæðingunum og svo er í framhaldi teknir fjarfundir með nýrnalæknum og hjúkrunarfræðingum á LSH þar sem áætlanir eru gerðar með áframhaldandi meðferð. Þess á milli hafa hjúkrunarfræðingar á göngudeildinni hjá HSU greiðan aðgang að starfsfólki blóðskilunardeildar LSH, bæði með vaktsíma sem alltaf er hægt að hringja í og eins í gegnum spjallrás Heilsugáttar. Upphaflega hófst starfsemi deildarinnar innst á gangi bráðamóttökunnar en í byrjun covid faraldursins var ákveðið að færa deildina upp á 2. hæð, þar sem áður var skurðstofa. Sú breyting reyndist vera af hinu góða og þar er deildin nú komin til með að vera. Þessa dagana standa yfir heilmiklar breytingar á húsnæði deildarinnar, starfsfólkinu til mikillar ánægju. Ákveðið hefur verið þegar þeim framkvæmdum lýkur, að bjóða starfsfólki og velunnurum deildarinnar í heimsókn til að skoða nýja aðstöðuna og fagna 10 ára starfsemi deildarinnar. Myndirnar að fylgja með fréttinni voru teknar á fyrsta skilunardegi þann 28. nóvember 2014.