Drónareglur - Opni flokkurinn

Hlusta

Opni flokkurinn inniheldur áhættulitla starfsemi dróna sem vega minna en 25 kg.

Kröfur:

Dróninn verður að vega minna en 25 kg
Fjarflugmaðurinn verður að hafa drónann ávallt í augsýn (VLOS)
Dróninn má ekki fljúga hærra en 120 m frá jörðu
Það má ekki fljúga yfir mannfjölda
Það má ekki fljúga með hættulegan varning
Það má ekki sleppa hlutum af drónanum
Dróninn verður að vera merktur með skráningarnúmeri umráðanda

Undirflokkar

Opna flokknum er skipt í þrjá undirflokka: A1, A2 og A3.

A1 – Leyfilegt að fljúga léttum drónum, C0 og C1, með minni takmörkunum á fjarlægð frá óviðkomandi fólki.
A2 – Leyfilegt að fljúga C2 drónum í þéttbýli með allt að 5 m lágmarksfjarlægð frá óviðkomandi fólki (30 m án hæflugsbúnaðs, 5 m með hægflugsbúnaði).
A3 – Leyfilegt að fljúga drónum allt að 25 kg að þyngd, með 150 m lágmarksfjarlægð frá byggðum svæðum.

Aldurstakmark

Lágmarksaldur drónaflugmanna er 16 ár.
Börn undir 16 ára mega fljúga drónum sem eru undir 250 grömm (C0) í A1 flokknum eða ef flogið er undir handleiðslu skráðs flugmanns með A1/A3 réttindi.
Forráðamaður þarf að skrá sig sem umráðamaður dróna fyrir börn á www.flydrone.is.

Opni flokkurinn

Skráning drónaflugmanna

Til að geta flogið í opna flokknum þurfa allir flugmenn að vera skráðir á skráningarsíðu Samgöngustofu, Flydrone.is (nema flugmenn C0 dróna án myndavélar). Til að geta flogið dróna sem vegur meira en 250 grömm þurfa flugmenn að lesa kennsluefni og standast A1/A3 hæfnipróf á skráningarsíðunni. Þeir sem standast prófið öðlast réttindi til að fljúga drónum allt að 900 grömm að þyngd í undirflokki A1 og allt að 25 kg að þyngd í undirflokki A3. Í undirflokki A2 er leyfilegt að fljúga mjög nálægt fólki og þar af leiðandi talinn áhættumesti undirflokkurinn í opna flokknum. Það eru gerðar meiri kröfur til hæfni flugmanna í undirflokki A2 og þarf að standast sérstakt A2 próf sem er aðeins haldið í húsakynnum Samgöngustofu eða hjá samþykktum aðila.

C-flokkur	Heimasmíðaðir og eldri drónar <250g C0 C0 án myndavélar	C1	C2 C2 með hægflugsham	C3 C4 Heimasmíðaðir og eldri drónar
Hámarksþyngd Dróna	undir 250 gr.	undir 900 gr.	undir 4 kg	undir 25 kg
Undirflokkur	A1 Ekki yfir mannfjölda (getur einnig flogið í undirflokki A3)	A1 Ekki yfir mannfjölda (getur einnig flogið í undirflokki A3)	A2 Fljúga nálægt fólki (getur einnig flogið í undirflokki A3)	A3 Fljúga langt frá fólki
Takmarkanir	Ekkert flug yfir mannfjölda	Ekkert áætlað flug yfir óviðkomandi fólk (ef það gerist skal halda flugi yfir fólki í lágmarki). Ekkert flug yfir mannfjölda	Ekkert flug yfir óviðkomandi fólk. Halda að lágmarki 50 m fjarlægð frá óviðkomandi fólki.	Ekkert flug nálægt eða yfir fólki. Halda að lágmarki 150 m fjarlægð frá byggðum svæðum
Skráning umráðanda	Já, nema dróninn sé ekki búinn myndavél og sé leikfang	Já	Já	Já
Hæfniskröfur	Lesa handbók framleiðandans	Lesa handbók framleiðandans. Ljúka þjálfun og standast próf á netinu fyrir opna flokkinn A1/A3	Lesa handbók framleiðandans. Ljúka þjálfun og standast próf fyrir opna flokkinn A1/A3 og A2	Lesa handbók framleiðandans. Ljúka þjálfun og standast próf á netinu fyrir opna flokkinn A1/A3
Lágmarksaldur	Enginn lágmarksaldur	16 ára	16 ára	16 ára

Reglugerð (ESB) 2019/947 heimilar hverju ríki að setja sérreglur um flug dróna til að taka á atriðum sem EASA-reglugerðin nær ekki yfir. Í reglugerð 1360/2024 eru eftirfarandi takmarkanir settar fram.

Óheimilt er að fljúga ómönnuðum loftförum innan 150 metra frá viðkvæmum stöðum, svo sem orkuverum, tengivirkjum, Alþingi, forsetabústað, ráðuneytum, sendiráðum, lögreglustöðvum, fangelsum og sjúkrahúsum, nema með heimild eigenda eða umráðenda.
Um flug í grennd við íbúðarhúsnæði eða þar sem fólk dvelur gilda reglur um vernd eignarréttar, friðhelgi einkalífs og persónuvernd.
Óheimilt er að fljúga ómönnuðum loftförum án leyfis rekstraraðila á flugvöllum, innan flugvallasvæða og innan bannsvæða umhverfis áætlunarflugvelli. Flug er þó leyfilegt án sérstaks leyfis innan bannsvæða ef flogið er undir hæð hæstu hindrana og innan 50 metra fjarlægðar frá flugferli loftfars.
Við flugbrautir annarra flugvalla skal gæta fyllsta öryggis og sýna ýtrustu varkárni.
Drónar skulu ávallt víkja fyrir allri annarri flugumferð.
Hlýða þarf fyrirmælum flugumferðarþjónustu, lögreglu, Landhelgisgæslunnar, Samgöngustofu og annarra yfirvalda.
Bannsvæði og höft fyrir flug ómannaðra loftfara eru auglýst á heimasíðu Samgöngustofu og í Flugmálahandbók Íslands (AIP).