Verkfalli lækna aflýst eftir samkomulag um kjarasamning

Í tilkynningu frá Læknafélagi Íslands (LÍ) segir að viðræður við ríkið hafi gengið vel undanfarna daga og hafi í dag þokast langt í samkomulagsátt. Stjórn og samninganefnd félagsins hafa því ákveðið að aflýsa verkföllum sem hefjast áttu á miðnætti og stóðu til hádegis frá mánudegi til fimmtudags í komandi viku.

„Það er mat stjórnar og samninganefndar LÍ að í þessari stöðu sé hið rétta að aflýsa fyrstu lotu verkfalla. Með því skapast betri forsendur til að ljúka viðræðum fljótt og farsællega,“ segir í tilkynningunni.

Félagsmenn LÍ verða áfram upplýstir um framvindu viðræðnanna eftir því sem þær þróast, en enn á eftir að ganga frá endanlegum samningi.

Ákvörðunin er talin mikilvægt skref í átt að sáttum milli lækna og ríkisins, en lengi hefur staðið styr um kjör og starfsaðstæður lækna hér á landi.