Starfsferð til Færeyja og samstarf við Vørn

Vørn er færeysk stofnun sem sér meðal annars um fiskveiðieftirlit og björgunstörf í færeyskri lögsögu. Vörn gegnir því hlutverki sem að nokkru svarar til Fiskistofu, Landhelgisgæslu Íslands og Veðurstofu Íslands. 

Á fundunum var fjallað um eflingu samstarfs, einkum eftirlit með veiðum íslenskra skipa á færeyskum miðum og veiðum færeyskra skipa á Íslandsmiðum. Sérstök áhersla var lögð á uppsjávarveiðar. Gott samstarf á milli þjóðanna er afar mikilvægt þar sem íslensk uppsjávarskip stunda umtalsverðar kolmunnaveiðar í færeyskri lögsögu og færeysk uppsjávar- og línuskip veiða talsvert hér við land.  

Gestgjafar okkar hjá Vørn tóku afar vel á móti hópnum og fengum við gott tækifæri til að kynnast samfélagi og atvinnuháttum eyjanna. Ekið var á milli byggða sem í senn bera merki öflugs sjávarútvegs og mikillar náttúrufegurðar. Á skrifstofum Vørn var einnig boðið upp á kynningu á  færeyskri matarmenningu, þar sem meðal annars var á boðstólum þurrkaður grindhvalur og saltað grindarspik.