Slæmt veðurútlit

Það er heldur dökkt veðurútlitið fyrir höfuðborgarsvæðið næsta sólarhringinn enda hefur Veðurstofan gefið út gula viðvörun fyrir umdæmið, en hún gildir frá kl. 20 í kvöld og til kl. 2 í nótt. Veðurspáin fyrir höfuðborgarsvæðið er annars svohljóðandi: Vaxandi suðaustanátt og þykknar upp og hlýnar, 13-23 m/s í kvöld, hvassast á Kjalarnesi. Snjókoma eða slydda og síðar rigning, hiti 1 til 5 stig í nótt. Suðvestan 10-15 og úrkomulítið seint í nótt, en suðvestan 15-23 eftir hádegi á morgun með storméljum og kólnar heldur.

Í kvöld og nótt má búast við versnandi færð á götum, einkum í efri byggðum. Íbúar eru jafnframt minntir á að huga sérstaklega að lausamunum og festa þá niður eða koma í skjól, en hér er t.d. átt við garðhúsgögn, grill og trampólín.

Fólk er hvatt til að fylgjast sérstaklega vel með veðurspám, bæði í dag og á morgun.