Samstarf og innsýn í málefni landamæra

Markmið heimsóknarinnar var að efla samstarf og samráð við stofnanir sem koma að landamæraeftirliti, hælisumsóknum og endursendingum. Fulltrúarnir fengu kynningar á aðstæðum og þeim áskorunum sem Ísland stendur frammi fyrir í málefnum landamæra, s.s. í tengslum við skipulagða brotastarfsemi, áhættur og þróun á sviði landamæraöryggis.

Ísland hefur um árabil tekið virkan þátt í verkefnum Frontex, m.a. með setu í stjórn stofnunarinnar og í gegnum Tækja- og mannauðsbanka stofnunarinnar, þar sem flugvélin TF-SIF frá Landhelgisgæslunni hefur verið helsta framlag Íslands.

Í heimsókninni voru fulltrúar Frontex kynntir fyrir helstu samstarfsaðilum á Íslandi og fóru í heimsóknir til:

• Flugstöðvardeildar lögreglunnar á Suðurnesjum

• Landamæradeildar lögreglunnar á höfuðborgarsvæðinu

• Landhelgisgæslunnar

• Skattsins- Tollgæslunnar

• Útlendingastofnunar

• Ríkislögreglustjóra – Landamæradeildar, Farþegaupplýsingadeildar og Heimferða- og fylgdadeildar

Í heimsóknunum var farið yfir stöðu og umfang verkefna tengdu landamæraeftirliti, hælisbeiðnum og endursendingum, auk innleiðingar á EES kerfinu og stefnumótun í samræmi við nýja sáttmála ESB um innflytjendamál og hælisleitendur. Þá var einnig rætt um stefnu í samþættri landamærastjórnun, viðbragðsáætlanir, menntunar- og þjálfunarmál svo fátt eitt sé nefnt.

Landamæradeild ríkislögreglustjóra vill koma á framfæri sérstökum þökkum til allra þeirra sem tóku á móti fulltrúum Frontex og veittu þeim dýrmæta innsýn í starfsemi og stöðu mála á Íslandi.