Nýtt löndunarkerfi tekið í notkun, GAFL kveður eftir 18 ár

Hornsteinn fiskveiðistjórnunar kveður

Frá árinu 2007 hefur aflaskráningarkerfið GAFL gegnt lykilhlutverki í skráningu afla á höfnum landsins. Á þessum 18 árum hafa tæplega milljón landanir verið skráðar í GAFL, eða nákvæmlega 926.210 landanir.

Það er því óhætt að segja að GAFL hafi verið hornsteinninn í fiskveiðistjórnunarkerfi Íslendinga og skipt sköpum í réttri aflaskráningu og sjálfbærri nýtingu fiskistofna.

Einfaldara, aðgengilegra og gagnsærra

Tímarnir breytast og kröfurnar aukast. Fiskistofa hefur því lokið við hönnun og forritun á nýju löndunarkerfi sem mun alfarið taka við af GAFL frá og með 1. desember 2025.

Nýja kerfið var hannað í nánu samstarfi við notendur (starfsmenn hafna) og var reynt að koma til móts við óskir þeirra, athugasemdir og ábendingar.

Meginmarkmið nýja kerfisins eru:

• Að vera aðgengilegra og einfaldara í notkun.

• Að styðja enn betur við rétta aflaskráningu.

• Að auka gagnsæi í ferlum.

Innleiðingu lýkur 1. desember

Þann 1. desember verður innleiðingu nýs löndunarkerfis hjá öllum höfnum landsins lokið og um leið verður slökkt á GAFL kerfinu.

Fiskistofa þakkar Hafnarsambandi Íslands og hafnarstarfsmönnum fyrir gott og ánægjulegt samstarf við hönnun og prófun nýja löndunarkerfisins.