14. október 2025
14. október 2025
Leiðtogum í tækni fagnað
Birna Íris Jónsdóttir framkvæmdastjóri Stafræns Íslands var tilnefnd á lokalista Nordic Women in Tech verðlaunanna í ár og sótti hátíðarviðburð í Helsinki síðastliðinn föstudag.
Nordic Women in Tech verðlaunin miða að því að fagna og auka sýnileika á framlagi kvenna í tæknigeiranum og leiðtogum á því sviði. Birna Íris var tilnefnd í flokknum Digital Transformation Leader of the Year sem beinir sjónum að fólki sem leiðir stafrænar vegferðir og nýsköpun sem stuðlar að samfélagslegum ávinningi.
„Það er heiður að vera á lista með svona flottum frumkvöðlum og framúrskarandi konum í tæknigeiranum á Norðurlöndunum. Við fögnum því að konur sæki fram á því sviði sem sögulega hefur í gegnum tíðina verið álitinn karllægur bransi. Nú vita allir að fjölbreytt teymi leysa flókin viðfangsefni hraðar og betur en einsleit. Ég lít á þessa tilnefningu sem mikilvæga viðurkenningu á árangri okkar hjá Stafrænu Íslandi í umbreytingu opinberrar þjónustu á Íslandi,“ segir Birna Íris.
Sigurvegari ársins var Edmary Altamiranda Maldonado sem starfar hjá Aker BP í Noregi og leiðir verkefni þeirra á sviði stafrænnar umbreytingar í iðn- og orkukerfum.