Hornsteinn

Laugardaginn 1. júní voru liðin 50 ár frá því að Ásgeir Ásgeirsson, forseti Íslands, lagði hornstein að lögreglustöðinni við Hverfisgötu í Reykjavík. Bygging hússins hófst í árslok 1961, en lögreglustöðin var tekin í notkun í áföngum eftir því sem byggingarframkvæmdum miðaði áfram. Umferðardeildin, sem þá var í bragga við Snorrabraut, flutti í kjallara nýju lögreglustöðvarinnar árið 1966 og í framhaldinu fékk Lögregluskólinn líka inni í húsinu. Fangageymslan var síðan tekin í notkun í ársbyrjun 1970 og 4. nóvember 1972 flutti lögreglan loks alla sína starfsemi í húsið. Tímamótanna um síðustu helgi var minnst með því að sett var upp minnismerkið, sem má sjá á myndinni hér að neðan.