Prófskírteini fylgi umsókn um starfsleyfi heilbrigðisstarfsmanna

Á undanförnum árum hefur það færst í vöxt að sótt sé um starfsleyfi heilbrigðisstarfsmanna áður en fyrir liggur formlegt útskriftarskírteini frá viðkomandi menntastofnun. Umsóknir hafa þá byggt á vottorði viðkomandi menntastofnunar um að lokið hafi verið tilskildum einingum í náminu en eiginleg brautskráning hafi ekki farið fram.

Hinn 15. janúar sl. sendi embætti landlæknis bréf til menntastofnana hér á landi, sem sjá um menntun heilbrigðisstétta, til að fá upplýsingar um afstöðu þeirra til veitingar starfsleyfis á grundvelli fyrrgreindra vottorða. Það var almennt mat forsvarsmanna skólanna að ekki væri unnt að líta svo á að slík vottorð væru ígildi prófskírteina.

Embætti landlæknis mun frá 1. júní 2021 fara fram á að umsókn um starfsleyfi fylgi prófskírteini viðkomandi skóla þegar sótt er um starfsleyfi á sviði löggiltrar heilbrigðisstéttar. Eftir sem áður mun embættið hraða afgreiðslu starfsleyfa eins og kostur er.

Leyfisveitingateymi