90% stóðust íslenskupróf fyrir ríkisborgararétt

Metfjöldi var skráður í prófið að þessu sinni. Prófið var haldið í 21 lotu í Reykjavík, á Akureyri, Egilsstöðum og Ísafirði. Prófin eru haldin tvisvar á ári í Reykjavík og á Akureyri, og einu sinni á ári á Egilsstöðum og Ísafirði, að vori. 

Eitt af grunnskilyrðum sem umsækjendur verða að uppfylla er að hafa staðist próf í íslensku fyrir íslenskan ríkisborgararétt. Prófið miðast við lokamarkmið í grunnnámi í íslensku fyrir útlendinga (240 stundir), samkvæmt námskrá barna- og menntamálaráðuneytisins. Það samsvarar A1-A2 færnimarkmiði út frá viðmiðunarramma Evrópuráðs fyrir erlend tungumál (Common European Framework of Reference for Languages).   

Sýna þarf fram á að geta: 

• bjargað sér við daglegar aðstæður í skóla, vinnu og einkalífi. 

• bjargað sér við óvæntar aðstæður. 

• tekið þátt í umræðum um kunnugleg málefni. 

• skilið einfaldar samræður. 

• lesið stutta texta á einföldu máli. 

• skrifað stutta texta á einföldu máli. 

• greint aðalatriði í sjónvarpi, útvarpi og dagblaði. 

Næstu íslenskupróf fyrir ríkisborgararétt munu fara fram í nóvember/desember 2024 og verða auglýst á heimasíðu Mímis, www.mimir.is.