Eftirlit með hvalveiðum

Eftirlit með hvalveiðum er tvíþætt og skiptist á milli Fiskistofu og Matvælastofnunar. Fiskistofa sinnir annars vegar almennu eftirliti með veiðum og skráningum en Matvælastofnun ber ábyrgð á eftirliti með velferð dýra við veiðar á hvölum.

Eftirlit með veiðum og skráningu

Eftirlit Fiskistofu með hvalveiðum byggist á lögum um hvalveiðar frá 1949. Fiskistofa hefur eftirlit veiðunum ásamt því að áhöfn uppfylli lögbundnar kröfur um menntun, þjálfun og lágmarksreynslu af hvalveiðum.

Eftirlitið tekur meðal annars til:

• veiða,

• veiðibúnaðar,

• veiðiaðferða,

• skráninga og gagnaskila,

• reynslu áhafnar,

• námskeiða í meðferð skutulbyssa og sprengiskutla,

• námskeiða í aflífunaraðferðum við hvalveiðar.

Eftirlit með velferð dýra

Matvælastofnun ber ábyrgð á reglubundnu eftirliti með því að farið sé að lögum um velferð dýra við hvalveiðar.

Eftirlitið felst í að sjá til þess að:

• veiðar séu framkvæmdar með þeim hætti að þær valdi langreyðum sem minnstum sársauka,

• aflífun taki sem skemmstan tíma.

Eftirfylgni vegna frávika

Fiskistofa fylgir eftir frávikum frá lögum um hvalveiðar og getur eftir atvikum sett mál í viðurlagaferli.

Eftirlitsgögn vegna frávika frá lögum um velferð dýra eru hins vegar á forræði Matvælastofnunar. Stofnunin annast eftirfylgni og afgreiðslu mála sem varða brot gegn þeim lögum.

Viðurlög

Brot gegn reglunum varða viðurlögum samkvæmt lögum um velferð dýra og lögum um hvalveiðar.

Upplýsingar um hvalveiðar fyrri ára má finna í ársskýrslum Fiskistofu.