Erlendur lögaðili, kaupandi skreiðarafurða, höfðaði mál til innheimtu á viðskiptastöðu samkvæmt yfirliti frá seljanda. Því var hafnað að seljandi hefði lofað greiðslu á umræddri fjárhæð og jafnframt var talið að stefnandi gæti ekki komið fram fyrir hönd annarra lögaðila sem höfðu lagt fé inn á umræddan reikning og sem myndað hafði þá kröfu sem krafist var dóms um í málinu. Viðskiptasamningur við stefnda talinn enn í gildi og því ljóst að uppgjör á honum yrði að fara fram annað hvort með afhendingu á vörum líkt og samningur aðila kvæði á um eða með lokun samningsins með einum eða öðrum hætt og uppgjöri milli aðila. Af þeim sökum var stefndi sýknaður að svo stöddu.
