Viðspyrnustyrkur

Fyrir hverja? 

Styrkirnir eru ætlaðir rekstraraðilum sem orðið hafa fyrir tekjufalli vegna kórónuveirufaraldursins. Styrkirnir verða greiddir út mánaðarlega fyrir einn mánuð í senn og hafa gildistíma frá nóvember 2020 og út mars 2022. 

Hvaða skilyrði eru sett? 

Lög um styrkina hafa verið samþykkt á Alþingi. Þar kemur fram að rekstraraðilar sem hafa vegna heimsfaraldursins orðið fyrir a.m.k. 40% tekjufalli í almanaksmánuði á tímabilinu frá 1. nóvember 2020 til og með mars 2022, samanborið við sama almanaksmánuð árið 2019, geta fengið styrk. 

Styrkfjárhæð verður ekki hærri en 90% af rekstrarkostnaði umsækjanda, þó aldrei hærri en sem nemur tekjufallinu á viðkomandi tímabili. 

Að auki eru eftirfarandi þrjú viðmið sett fram um styrkfjárhæðir: 

• 40–60% tekjufall: 300 þúsund króna hámarksstyrkur fyrir hvert stöðugildi, að hámarki 1,5 milljónir króna. 

• 60–80% tekjufall: 400 þúsund króna hámarksstyrkur fyrir hvert stöðugildi, að hámarki 2 milljónir króna. 

• 80–100% tekjufall: 500 þúsund króna hámarksstyrkur fyrir hvert stöðugildi, að hámarki 2,5 milljónir króna. 

• Heimilt er að miða fjölda stöðugilda við fjölda þeirra í sama mánuði 2019. 

Önnur helstu skilyrði laganna: 

• Tekjufallið má rekja til heimsfaraldursins eða ráðstafana stjórnvalda til að verjast útbreiðslu hans. 

• Tekjur í þeim mánuði sem sótt er um eru a.m.k. 40% lægri en í sama almanaksmánuði 2019. Hafi rekstraraðili hafið starfsemi eftir upphaf sama almanaksmánaðar skal miða við meðaltekjur á jafnmörgum dögum og eru í þeim almanaksmánuði sem umsókn varðar frá því hann hóf starfsemi til loka október 2020. 

• Tekjur frá 1. janúar 2020 til loka október 2020 voru a.m.k. 500.000 kr. 

• Rekstraraðili er ekki í vanskilum með opinber gjöld, skatta og skattsektir. 

• Rekstraraðili hafi staðið skil á ársreikningum og upplýst um raunverulega eigendur. 

• Rekstur hefur ekki verið tekinn til slita eða til gjaldþrotaskipta. 

Upplýsingar vegna ríkisaðstoðar 

Viðspyrnustyrkir fela í sér ríkisaðstoð. Hámarksstuðningur er 330 m.kr. að meðtöldum lokunarstyrkjum fyrir lokunartímabil eftir 17. september 2020, tekjufallsstyrkjum, styrkjum til rekstraraðila veitingastaða sem hafa sætt takmörkunum á opnunartíma og ferðagjöf. Sé um fyrirtæki í erfiðleikum að ræða takmarkast heildarfjárhæð til viðkomandi rekstraraðila við 30 millj.kr. í samræmi við reglur um minniháttaraðstoð. 

Hvar er sótt um? 

Skatturinn sér um framkvæmd viðspyrnustyrkja.  

Athugið að umsóknir um viðspyrnustyrk þurfa að berast eigi síðar en 30. júní 2022.