Ef einhver tími er liðinn frá broti getur þú haft samband við lögreglu er þér gefið samband við sérhæfða kærumóttöku. Þar er hægt að óska eftir upplýsingum um ferlið og gefa jafnframt upplýsingar um kæruefnið. Þar færðu ráðleggingar og nánari upplýsingar um framhaldið hvað varðar að fá réttargæslumann og bóka tíma í skýrslutöku.
Það er mjög mikilvægt að þú leitir hjálpar sem fyrst. Gott er að hafa samband við lögreglu en einnig er gott að leita til annarra sem þekkja ferlið og geta leiðbeint þér. Hér er að finna upplýsingar um þá aðila sem geta veitt aðstoð.
Fyrstu skrefin eru að hafa samband við kærumóttöku kynferðisbrota í síma 444 1000 eða á netfangið kr1@lrh.is og fá nánari upplýsingar og bóka tíma til að gefa skýrslu.
Lögreglan er til staðar til að aðstoða og rannsaka mál sem koma inn á þeirra borð og veita þér og öllum þeim sem óska eftir upplýsingum og ráðleggingar með framhaldið.
Hægt er að leggja fram kæru eða tilkynna brot hvenær sem er.
Engu skiptir þó það hafi gerst nýlega eða lengri tími sé liðinn.
Réttargæslumaður er lögmaður sem hefur það hlutverk að gæta hagsmuna þinna og veita aðstoð á meðan málið þitt er í vinnslu.
Réttargæslumaður sér um að fylgja málinu þínu eftir og fylgjast með framgangi þess á meðan það er í rannsókn.
Réttargæslumaður er viðstaddur skýrslutöku og ef málið fer fyrir dóm.
Réttargæslumaður leggur fram bótakröfur í mál fyrir þína hönd
Réttargæslumaður getur aflað upplýsinga um stöðu og meðferð málsins á meðan það er í vinnslu hjá lögreglu og ákæruvaldi.
Réttargæslumaður er almennt aðili sem er lögfræðingur sem hægt er að finna á lögmannalistanum sem finna má hér
Kærumóttaka kynferðisbrota hefur einnig lista af réttargæslumönnum sem hafa komið oft að málum sem þessum og er hægt að óska þessa að fá hann sendan.
Þjónusta réttargæslumanns er gjaldlaus þjónusta og þóknun hans greiðist úr ríkissjóði.
Þú getur alltaf haft samband við lögreglu til að fá ráðleggingar varðandi brot sem þú eða aðstandandi hefur orðið fyrir. Það er ekki skylda að leggja fram formlega kæru eða tilkynningu til að fá ráðleggingar. Þú getur haft samband í síma 444 1000 eða sent tölvupóst á kr1@lrh.is
Einng er hægt að hafa samband við Bjarkarhlíð og óska þar eftir ráðgjöf og upplýsingum. Þar eru starfandi ráðgjafar, sálfræðingur og lögregla.
Það er algengt að fólk ákveður að leggja fram kæru einhverjum tíma frá því að brotið átti sér stað.
Oft tekur tíma fyrir fólk að átta sig á aðstæðum og vinna úr afleiðingunum. Fyrningartími vegna kynferðisbrota fer eftir því undir hvaða grein réttarkerfið fellir kæruna.
Fyrning brota samkvæmt 81.gr hegningarlaganna er sem hér segir:
Á 2 árum, þegar ekki liggur þyngri refsing við broti en 1 árs fangelsi
Á 5 árum, þegar ekki liggur fyrir þyngri refsing við broti en 4 ára fangelsi
Á 10 árum, þegar ekki liggur þyngri refsing við broti en 10 ár
Á 15 árum, þegar þyngsta refsing við broti er meira en 10 ára tímabundið fangelsi
Það er misjafnt hvort taka þurfi fleiri en eina skýrslu á meðan rannsókn er í gangi. Í sumum tilfellum er tekin frumskýrsla á vettvangi eða á neyðarmóttöku en síðar er formleg skýrslutaka sem tekin er upp í hljóði og mynd.
Í sumum tilfellum koma fram nýjar upplýsingar á síðari stigum rannsókna og þá gæti þurft að taka aðra skýrslu til að bera þær upplýsingar undir þig og til að staðfesta að þær séu réttar.
Þegar skýrslutaka er bókuð er þér boðinn tími á lögreglustöð með réttargæslumanni. Viðtalið fer fram í sérstöku herbergi sem er sérhannað til að veita öryggi og ró. Viðtalið er tekið upp í hljóði og mynd en það er gert til að reyna að auka gæði rannsóknarinnar og fækka tilvikum þar sem fólk þarf að koma aftur í skýrslutöku.
Við skýrslutöku er markmiðið að þú fáir tækifæri til að greina frá atvikum og koma fram öllum þeim upplýsingum sem lögregla telur nauðsynlegar við rannsóknina. Skýrslutökur fara oftast fram á lögreglustöð en í sumum tilfellum er skýrsla tekin annarsstaðar ef nauðsynlegt þykir.
Skýrslutökur yfir börnum 15-17 ára fara fram á lögreglustöð að viðstöddum réttargæslumanni og fulltrúa frá Barnavernd.
Þegar skýrslur eru teknar af börnum yngri en 15 ára er reynt eftir fremsta megni að skapa góðar aðstæður fyrir barnið
Dómari ákveður hvar skýrslutakan fer fram en alla jafna fara skýrslutökur fram í sérútbúnu herbergi í Barnahúsi þar sem sérfræðingur Barnahúss eða lögreglu ræðir við barnið
Dómari, réttargæslumaður barnsins, barnaverndarfulltrúi, fulltrúi ákæruvalds og verjandi sakbornings fylgjast með í gegnum sjónvarp og geta varpað fram spurningum til þess sem ræðir við barnið
Ef málið fer fyrir dóm er þessari aðferð beitt til að koma í veg fyrir að barn þurfi að endurtaka frásögn sína fyrir dómi
Lögregla getur hætt rannsókn ef ekki þykir grundvöllur til að halda henni áfram, t.d. ef ekki þykir efni til að halda áfram rannsókn vegna skorts á sönnunum eða ef það kemur í ljós að kæra hefur ekki verið á rökum reist.
Lögregla getur hætt rannsókn máls t.d. ef ætlaður gerandi finnst ekki, brot er talið fyrnt eða ef frekari gagnaöflun er ekki talin líkleg til að veita frekari upplýsingar um málsatvik. Ef málið er hins vegar fullrannsakað er það sent til héraðssaksóknara sem tekur ákvörðun um niðurstöðu máls.
Ef kæru er vísað frá eða rannsókn hætt þá er það tilkynnt sérstaklega. Kæra má ákvörðun lögreglu til ríkissaksóknara.
Kæra skal vera skrifleg og koma þarf fram málsnúmer lögreglu eða héraðssaksóknara og gott er að láta ljósrit af bréfi lögreglustjóra eða héraðssaksóknara fylgja með.
Ekki gilda formlegar reglur um kæruna en gott er að þar komi fram helstu kröfur og sjónarmið Þú getur annað hvort sent kæruna til ríkissaksóknara bréfleiðis eða á netfangið saksoknari@saksoknari.is Nánari upplýsingar má finna á heimasíðu ríkissaksóknara.
