Styrkir til strandhreinsunar

Félagasamtök, áhugamannafélög, íþróttafélög og aðrir lögaðilar geta sótt um styrk fyrir verkefni sem felst í hreinsun strandlengju Íslands.

Um verkefnið

Ákveðið hefur verið að framlengja verkefnið „Strandhreinsun Íslands“ um þrjú ár til viðbótar, á árunum 2026–2028. Strandhreinsun Íslands átakið var áður unnið á árunum 2021–2025 sem hafði það markmið að hreinsa strandlengju landsins af plasti og öðrum úrgangi. Verkefnið byggði á aðgerð 17 í aðgerðaáætlun stjórnvalda í plastmálefnum, Úr viðjum plastsins.

Hreinleiki sjávar er afar mikilvægur fyrir Ísland, bæði með tilliti til náttúruverndar, lífríkis og atvinnustarfsemi. Strandhreinsanir stuðla að verndun hafsins, auka vitund almennings um plastmengun og efla samfélagslega þátttöku í umhverfisvernd.

Markmið

Tilgangurinn með styrkveitingunum er sá að strandlengja Íslands verði hreinsuð með skipulegum hætti, hreinsuðum ströndum verði haldið við, efla vitundarvakningu hjá almenningi um mikilvægi strandhreinsana og virkja áhugasama aðila til þátttöku í átaki um hreinsun strandlengjunnar. 

Skilyrði

Styrkþegar skulu skila gögnum um framgang hvers verkefnis og tölulegar upplýsingar um magn þess úrgangs sem er hreinsaður: Upplýsingarnar verða sýnilegar á heimasíðu verkefnisins strandhreinsun.is. 

Styrkir verða veittir til afmarkaðra verkefna og verða þeir almennt veittir til eins árs í senn. 

Reglur um styrkveitingar til verkefna sem felast í hreinsun á strandlengju Íslands. 

Upphæð

Heildarstyrkupphæð vegna verkefnisins fyrir árið 2026 eru 30 milljónir króna.

Umsóknarfrestur

Frestur til að sækja um styrk er til 17. apríl 2026.