Hjúkrunarfræðingur í geðrofs- og samfélagsgeðteymi - dagvinna

Það er laus staða í teyminu fyrir metnaðarfulla hjúkrunarfræðinga sem hafa áhuga á þverfaglegri teymisvinnu og klínískri meðferðarvinnu.

Starfsumhverfið er spennandi, krefjandi og skemmtilegt. Um dagvinnu er að að ræða, en sé óskað eftir vöktum er það möguleiki í samstarfi við legudeildir geðþjónustu. Starfsaðlögun er markviss og einstaklingshæfð og miklir möguleikar eru til starfsþróunar og sérhæfingar. Staðan er laus frá og með 1. maí 2026, eða eftir samkomulagi.

Meginverkefni teymanna er að veita fólki sem greinst hefur með alvarlega geðsjúkdóma og aðstandendum þeirra þverfaglega og einstaklingsmiðaða þjónustu. Þjónustan byggir á batamiðaðri hugmyndafræði og skaðaminnkandi nálgun. Þjónustan fer fram á göngudeildinni, en einnig er þjónusta veitt í nærumhverfi þjónustuþeganna.

Markmið meðferðarinnar er að stuðla að bata, rjúfa félagslega einangrun og auka virkni og lífsgæði í daglegu lífi. Í teyminu starfa um 25 fagaðilar; læknar, hjúkrunarfræðingar, félagsráðgjafar, sálfræðingar, atvinnuráðgjafar, jafningjar og málastjórar með fjölbreyttan bakgrunn.

Hjúkrunarfræðingar í teymi sinna einnig málastjórn. Hlutverk málastjóra er fjölbreytt og felst meðal annars í mati á geðrænum einkennum og mati á einstaklingsbundnum þörfum. Málastjóri sinnir meðferð og eftirfylgd, þróun meðferðaráætlana og vöktun og mati á árangri þjónustunnar. Málastjóri er einnig í samskiptum við aðstandendur sem og aðra aðila sem þjónusta einstakling.

Starfsemin er í stöðugri þróun og lögð er áhersla á virkt umbótastarf og hjúkrunarfræðingar gegna lykilhlutverki í mótun framtíðarsýnar, eflingu hjúkrunar, meðferðar og endurhæfingu fyrir einstaklinga með alvarlega geðsjúkdóma.Hjúkrunarfræðingi með áhuga á heildrænni nálgun og með reynslu af því að vinna með lífsstílstengda sjúkdóma gæti fundist starfið spennandi, þar sem mikil nýsköpun á sér stað í teyminu hvað varðar þróun á sérhæfðri lífsstílsíhlutun fyrir þjónustuþega teymis.

Góður starfsandi ríkir á deild og starfsumhverfið er fjölskylduvænt. Áhugasamir eru hvattir til að hafa samband við Eygló, deildarstjóra, ef óskað er eftir frekari upplýsingum um starfið.

• Þátttaka í þverfaglegu teymi, sinnir málastjórn, klínískri meðferð þjónustuþega og aðstandendastuðningi

• Vaktstjórn og lyfjagjafir ásamt öðrum hjúkrunartengdum verkefnum

• Heldur utan um skipulagningu og framkvæmd verkefna og vinnur samkvæmt stöðluðum verkferlum

• Tekur þátt í umbótastarfi og þróun þjónustu

• Þjálfun og kennsla hjúkrunarnema

• Starfar samkvæmt öryggisverkferlum deildar

• Stuðlar að góðum starfsanda og menningu sálræns öryggis

• Íslenskt hjúkrunarleyfi

• Meistaranám er kostur

• Einlægur áhugi á geðhjúkrun, reynsla af starfi í geðþjónustu Landspítala eða sambærilegu starfi er kostur

• Mjög góð samskiptahæfni

• Jákvætt hugarfar, metnaður og áhugi á að starfa í þverfaglegu teymi

• Hæfni til að vinna sjálfstætt og sýna frumkvæði í starfi

• Stundvísi, áreiðanleiki og öguð vinnubrögð

• Færni til að skipuleggja og forgangsraða verkefnum

• Góð almenn tölvukunnátta og geta til að læra nýjungar

• Góð færni í íslensku og ensku, önnur tungumálakunnátta er kostur

• Bílpróf

Laun samkvæmt gildandi kjarasamningi sem fjármála- og efnahagsráðherra og Félag íslenskra hjúkrunarfræðinga hafa gert.

Umsókn fylgi náms- og starfsferilskrá ásamt kynningarbréfi og afriti af prófskírteinum og starfsleyfi. Fylgiskjöl skulu vera á pdf formi.

Tekið er mið af jafnréttisstefnu Landspítala við ráðningar á spítalanum. Öllum umsóknum verður svarað.

Landspítali er lifandi og fjölbreyttur vinnustaður þar sem um 7000 einstaklingar starfa í þverfaglegum teymum og samstarfi ólíkra fagstétta. Framtíðarsýn Landspítala er að þar sé veitt framúrskarandi heilbrigðisþjónusta byggð á vísindum, fagmennsku og umhyggju, öflugu fagfólki og studd með umgjörð og aðbúnaði sem sómi er að.

Landspítali hefur hlotið jafnlaunavottun samkvæmt jafnlaunastaðlinum ÍST85:2012, úttekt framkvæmd af Versa vottun ehf.

Umsóknir geta gilt í 6 mánuði frá því að umsóknarfrestur rennur út, sbr. 2. gr. reglna nr. 464/1996, um auglýsingar á lausum störfum með síðari breytingum.

Starfsmerkingar: Heilbrigðisþjónusta, Hjúkrunarfræðingur, hjúkrun

Tungumálahæfni: íslenska 4/5

Staðsetning: Kleppsgarður, 104 Reykjavík