Lögreglumenn - sumarafleysingar - Lögreglan á Suðurlandi

Við embætti lögreglustjórans á Suðurlandi eru lausar til umsóknar tímabundnar stöður lögreglumanna til sumarafleysinga við almenna löggæslu, n.t.t. frá 1. júní til 31. ágúst 2026, með möguleika á framlengingu.

Hlutverk lögreglu er m.a. að gæta almannaöryggis og sinna löggæslustörfum þ.m.t. forvarnarstörfum og rannsóknir mála. Í því felst að halda uppi lögum og reglu, tryggja öryggi borgaranna og ríkisins, greiða götu borgaranna og aðstoða þegar hætta steðjar að eða slys ber að höndum. Vinna að uppljóstran brota og stöðva ólögmæta háttsemi. Nánar er fjallað um hlutverk og verksvið lögreglumanna í lögreglulögum nr. 90/1996 og reglugerð um starfsstig innan lögreglunnar nr. 1051/2006.

Lögreglumaður skal hafa lokið diplómamenntun frá Lögregluskóla ríkisins eða diplómaprófi í lögreglufræðum sem jafngildir a.m.k. 120 stöðluðum námseiningum, þ.m.t. starfsnámi á vegum lögreglunnar.

Vakin er athygli á því að lögreglustjóra er heimilt að ráða starfsmenn sem ekki hafa lokið prófi frá Lögregluskóla ríkisins eða diplómaprófi í lögreglufræðum eða starfsnámi á vegum lögreglunnar að því gefnu að ekki fáist faglærðir lögreglumenn í lausar stöður. Þau sem ekki hafa áður starfað í lögreglu verða að vera reiðubúin til að sitja námskeið fyrir afleysingafólk í lögreglu, standast þrekpróf og læknisskoðun. Ófaglærð þurfa að uppfylla inntökuskilyrði nema í starfsnám hjá lögreglu sbr. 38. gr. lögreglulaga nr. 90/1996.

Góð færni í mannlegum samskiptum, ábyrgð, nákvæmni, frumkvæði, heilindi og hæfni til að starfa í hóp eru mikilvægir persónlegir eiginleikar.

Laun samkvæmt gildandi kjarasamningi sem fjármála- og efnahagsráðherra og Landssamband lögreglumanna hafa gert.

Starfið heyrir undir löggæslusvið embættisins. Um vaktavinnu er að ræða og 100% starfshlutfall. Starfsstöðvar lögreglunnar á Suðurlandi eru á Selfossi og Hvolsvelli (vestursvæði) Vík og Kirkjubæjarklaustri (miðsvæði) og á Höfn (austursvæði). Lögreglumenn á vestursvæði ganga sólarhringsvaktir en á lögreglumönnum á miðsvæði og austursvæði hvílir bakvaktaskylda hluta sólarhrings.

Vakin er athygli á að engan má skipa, setja eða ráða til starfa hjá lögreglu sem hefur hlotið fangelsisdóm fyrir refsiverðan verknað sem framinn var eftir að hann varð fullra 18 ára eða sýnt af sé háttsemi sem rýrt getur það traust sem starfsmenn lögreglu verða að njóta, sbr. 28. gr. a lögreglulaga. Með umsókn sinni heimilar umsækjandi lögreglustjóra að staðreyna með öflun upplýsinga úr sakaskrá og málaskrám lögreglu hvort umsækjandi uppfylli þessi skilyrði.

Umsóknir sem berast eftir að umsóknarfresti lýkur verða ekki teknar til greina. Starfsumsókn gildir í 6 mánuði og öllum umsóknum verður svarað.

Sótt er um starfið rafrænt á hlekknum hér að neðan. Umsókn skulu fylgja afrit prófskírteina/námskeiða, ferilskrá og kynningarbréf að hámarki ein blaðsíða.

Öll kyn eru hvött til að sækja um í ljósi ríkjandi kynjahlutfalls innan lögreglu og m.v.t. jafnréttisáætlunar lögreglunnar.