Heimahjúkrunarlausnin í sjúkraskrárkerfinu Sögu hjálpar starfsfólki að skipuleggja heimahjúkrun og skrá veitta þjónustu. Þar er haldið utan um þjónustuþörf skjólstæðinga, skiptingu verkefna milli teyma og áætlanir um vitjanir.

Starfsfólk fær yfirsýn yfir skjólstæðinga sína og getur skráð meðal annars vitjanir, mælingar og framvindu meðferðar. Þannig styður lausnin við samræmd vinnubrögð og samfellu í þjónustu.

Helix Health sér um þróun og þjónustu. Hún er hýst með Sögu hjá hverjum þjónustuveitanda.

Fyrsta útgáfa lausnarinnar var tekin í notkun árið 2019.

Hekla heilbrigðisnet tengir saman heilbrigðisstofnanir, heilbrigðisstarfsfólk, lyfjabúðir og tengdar stofnanir á Íslandi. Um netið fara meðal annars læknabréf, tilvísanir, lyfjaávísanir og vottorð. Hekla er þannig einn af lykilinnviðum stafrænnar heilbrigðisþjónustu en notkun þess hófst árið 2007.

Hekla er lokað net sem miðlar upplýsingum milli kerfa og geymir skeyti þar til móttaka hefur verið staðfest. Netið tengir einnig saman miðlæga grunna heilbrigðiskerfisins og miðlar upplýsingum sem fólk sér á Mínum síðum á Heilsuveru.

Embætti landlæknis á Heklu og Stafræn heilsa annast reksturinn. Helix Health sér um þróun og þjónustu og netið er hýst hjá Origo.

Hér má finna alla tiltæka skjölun fyrir Heklu umhverfið og þær þjónustur sem keyrðar eru þar.

Hreyfiseðill styður fólk sem þarf aðstoð við að auka hreyfingu til heilsubótar. Læknir ávísar hreyfingu og sjúkraþjálfari, sem gegnir hlutverki hreyfistjóra, útbýr áætlun með einstaklingnum út frá getu hans og áhuga.

Stafræna lausnin hjálpar hreyfistjóranum að halda utan um áætlunina og fylgjast með framvindu. Einstaklingurinn getur skoðað áætlun sína, skráð hreyfingu og fengið skilaboð á Mínum síðum á Heilsuveru.

Helix Health sér um þróun og þjónustu. Sá hluti sem starfsfólk notar er hýstur með Sögu hjá hverjum þjónustuveitanda en sú eining sem snýr að notendum er hluti af þjónustuvef Heilsuveru.is.

Fyrsta útgáfa stafrænu lausnarinnar var tekin í notkun árið 2019.

Kóðun er undirstaða staðlaðra skráninga og stafrænar lausnir eru notaðar til að halda utan um samræmda kóða sem notaðir eru við skráningu í heilbrigðisþjónustu.

Kóðarnir lýsa meðal annars sjúkdómum, meðferð, lyfjum og rannsóknum og hjálpa til við að upplýsingar séu skráðar og túlkaðar með sama hætti.

Lausnirnar styðja við þýðingar, uppfærslur og útgáfu kóðanna. Samræmd skráning auðveldar yfirsýn yfir sjúkrasögu og vinnslu upplýsinga fyrir gæðastarf, tölfræði og rannsóknir.

Stafræn heilsa rekur lausnirnar í umboði embættis landlæknis. Þær eru hýstar hjá Sensa og voru teknar í notkun árið 20212.

Lyfjaávísanagátt heldur utan um virkar rafrænar lyfjaávísanir á Íslandi. Þangað senda læknar og aðrir sem hafa heimild til að ávísa lyfjum ávísanir sínar. Lyfjabúðir sækja þær síðan í gáttina þegar fólk leysir út lyfin sín. Notkun hófst árið 2007.

Gáttin staðfestir ávísunarheimild þess sem ávísar og heldur utan um afgreiðslu lyfjanna, meðal annars hversu mikið er eftir á hverri ávísun. Hún er einnig mikilvæg uppspretta upplýsinga fyrir Miðlægt lyfjakort og lyfjatölfræði landlæknis.

Stafræn heilsa rekur Lyfjaávísanagátt í umboði embættis landlæknis. Helix Health sér um þróun og þjónustu en gáttin er hýst hjá Origo sem hluti af Heklu heilbrigðisneti.

Lyfjagagnagrunnur landlæknis safnar upplýsingum um lyfjaávísanir og afgreiðslu lyfseðilsskyldra lyfja á Íslandi. Hann veitir læknum og öðrum meðferðaraðilum með tilskildar heimildir aðgang að lyfjasögu sjúklinga og styður þannig við örugga lyfjameðferð.

Grunnurinn er einnig notaður við eftirlit með ávísunum og lyfjanotkun, gerð tölfræði og vísindarannsóknir með viðeigandi heimildum. Einstaklingar eiga rétt á upplýsingum um eigin lyfjasögu úr grunninum.

Stafræn heilsa rekur grunninn í umboði embættis landlæknis. Hann er hýstur hjá Sensa en Helix Health þjónustar gagnasendingar og uppflettingar um Heklu heilbrigðisnet, sem er hýst hjá Origo.

Notkun hófst árið 2012.

Meðvera styður við fólk í krabbameinslyfjameðferð og samskipti þess við heilbrigðisstarfsfólk milli meðferðarheimsókna. Sjúklingar skrá líðan og einkenni með því að svara spurningalistum á Mínum síðum á Heilsuveru.

Út frá svörunum birtir kerfið viðeigandi fræðsluefni eða vekur athygli meðferðarteymis á einkennum sem þarf að skoða nánar. Sjúklingar hafa jafnframt yfirsýn yfir svör sín, fræðsluefni og skilaboð tengd meðferðinni.

Meðvera var þróuð í samstarfi Embættis landlæknis, Krabbameinsfélags Íslands og Landspítala. Stafræn heilsa rekur lausnina í umboði embættis landlæknis, Helix Health sér um þróun og þjónustu. Starfsfólk notar þjónustuna í Sögu hjá sínum þjónustuveitanda en almenningur í gegnum þjónustuvef Heilsuveru.

Fyrsta útgáfa var tekin í notkun árið 2019.

Miðlægar rannsóknaniðurstöður er lausn sem safnar saman niðurstöðum blóðrannsókna frá rannsóknastofum. Markmiðið er að heilbrigðisstarfsfólk geti fengið yfirsýn á einum stað, fylgst með breytingum á blóðgildum og dregið úr óþarfa endurteknum rannsóknum.

Innleiðingu er ekki lokið hjá öllum rannsóknastofum.

Stafræn heilsa sér um rekstur grunnsins í umboði embættis landlæknis. Helix Health þróar birtingarhlutann í Sögu og á þjónustuvef Heilsuveru.is og þjónustar lausnina.
Stafræn heilsa sér einnig um uppfærslur á rannsóknarkóðum.

Miðlægi grunnurinn er hýstur hjá Origo en Sögu-hlutinnt hjá hverjum þjónustuveitanda.

Fyrsta útgáfa var tekin í notkun árið 2022.

Miðlægt lyfjakort sameinar upplýsingar um lyfjameðferð einstaklings á einum stað. Það hjálpar fólki og heilbrigðisstarfsfólki sem kemur að meðferð þess að fá yfirsýn yfir lyfin án þess að leita upplýsinga á mörgum stöðum. Notkun hófst árið 2023.

Kortið sýnir meðal annars föst lyf, lyf sem tekin eru eftir þörfum og tímabundna lyfjakúra. Læknar og klínískir lyfjafræðingar uppfæra kortið þegar lyfjameðferð breytist. Fólk getur skoðað eigið lyfjakort á Mínum síðum á Heilsuveru.

Stafræn heilsa rekur Miðlæga lyfjakortið í umboði embættis landlæknis en Helix Health sér um þróun og þjónustu. Kerfið er hýst hjá origo sem hluti af Heklu heilbrigðisneti.

Miðlægur biðlisti safnar saman upplýsingum um bið eftir heilbrigðisþjónustu á Íslandi. Upplýsingar berast sjálfkrafa úr kerfum heilbrigðisstofnana og veita betri yfirsýn yfir fjölda fólks á biðlistum og stöðu þeirra.

Lausnin auðveldar starfsfólki að halda utan um biðlista og sjá hvort einstaklingur bíði þegar eftir sömu meðferð annars staðar. Hún dregur jafnframt úr handvirkri gagnasöfnun. Sjúklingar geta séð stöðu sína á Mínum síðum á Ísland.is og tölfræði um biðlista er birt á vef landlæknis.

Stafræn heilsa rekur miðlæga biðlistagrunninn sem er hýstur hjá Sensa. Helix Health sér um þann hluta sem snýr að Sögu og þjónustar gagnasendingar um Heklu heilbrigðisnet.

Kerfið fór fyrst í notkun árið 2022.

Miðlægur bólusetningargrunnur safnar saman rafrænum skráningum um bólusetningar á Íslandi. Þegar heilbrigðisstarfsfólk skráir bólusetningu í sjúkraskrárkerfi berast upplýsingarnar sjálfkrafa í grunninn. Grunnurinn fór í notkun árið 2007.

Grunnurinn auðveldar heilbrigðisstarfsfólki að sjá hvaða bólusetningar einstaklingur hefur fengið, óháð því hvar þær voru skráðar. Upplýsingarnar eru einnig notaðar til að fylgjast með þátttöku í bólusetningum og taka saman tölfræði.

Stafrænn heilsa sér um rekstur í umboði embættis landlæknis en Helix Health um þróun og þjónustu. Grunnurinn er hýstur hjá Origo sem hluti af Heklu heilbrigðisneti.

Rafrænt dánarvottorð gerir læknum kleift að fylla út og undirrita dánarvottorð rafrænt í sjúkraskrárkerfinu Sögu. Nauðsynlegar upplýsingar berast síðan sjálfkrafa til Embættis landlæknis, Þjóðskrár og sýslumanna.

Lausnin leysir af hólmi pappírsvottorð og dregur úr því að aðstandendur þurfi að flytja gögn milli stofnana. Hver stofnun fær þær upplýsingar sem hún þarf vegna sinna verkefna. Upplýsingar um dánarorsök fara til landlæknis og eru skráðar í Dánarmeinaskrá.

Stafræn heilsa rekur dánameinarskrá í umboði embættis landlæknis. Helix Health sér um virkni vottorða í Sögu. Dánarmeinaskrá er hýst hjá Sensa, Hekla hjá Origo og Saga hjá hverjum þjónustuveitanda.

Lausnin var tekin í notkun árið 2022.

Sjálfvirk gagnasöfnun í Heklu flytur upplýsingar úr sjúkraskrárkerfum í heilbrigðisskrár landlæknis. Þar á meðal eru upplýsingar um komur og innlagnir, lyfjaávísanir, bólusetningar og tilkynningaskylda smitsjúkdóma.

Upplýsingarnar berast sjálfkrafa eftir skráningu, ýmist strax eða í daglegum sendingum. Þetta dregur úr handvirkri gagnavinnu og styður við tölfræði, eftirlit og yfirsýn yfir heilbrigðisþjónustu og útbreiðslu sjúkdóma.

Stafræn heilsa rekur lausnina í umboði embættis landlæknis. Helix Health sér um þróun og þjónustu við gagnasendingar. Gagnasendingar fara um Heklu, sem er hýst hjá Origo, en gagnagrunnar embættisins eru hýstir hjá Sensa.

Notkun hófst árið 2009.

Tilvísanagátt heldur utan um rafrænar tilvísanir í heilbrigðisþjónustu. Læknar og annað heilbrigðisstarfsfólk senda tilvísanir úr sínum sjúkraskrárkerfum og þeir sem taka að sér meðferð sækja þær í gáttina.

Gáttin auðveldar starfsfólki að fylgjast með stöðu tilvísana, skiptast á upplýsingum og senda niðurstöður að lokinni meðferð. Sjúklingar geta séð stöðu tilvísana sem fara um gáttina á Mínum síðum á Ísland.is.

Stafræn heilsa rekur tilvísanagáttina í umboði embættis landlæknis. Helix Health sér um þróun og þjónustu en gáttin er hýst hjá Origo sem hluti af Heklu heilbrigðisnðeti. Tilraunainnleiðing hófst árið 2023 með tilvísunum til sjúkraþjálfara.

Vottorðagátt heldur utan um rafræn vottorð, sérfræðimat og endurhæfingaráætlanir vegna endurhæfingar- og örorkukerfisins. Heilbrigðisstarfsfólk sendir gögnin úr sínum sjúkraskrárkerfum í gáttina.

Þeir sem hafa heimild og koma að máli einstaklings, svo sem starfsfólk Tryggingastofnunar og samhæfingarteyma, geta sótt þangað nauðsynlegar upplýsingar. Gáttin styður þannig við samvinnu og samfellu í endurhæfingu og þjónustu.

Helix Health sér um þróun og þjónustu og gáttin er hýst hjá Origo sem hluti af Heklu heilbrigðisneti.

Notkun hófst árið 2025.