Sjúkratryggingar hafa síðustu þrjú ár boðið út slíkar aðgerðir til aðila í einkarekstri til að auka afkastagetu og vinna niður biðlista. Áður var gerð krafa um að öll sem færu í aðgerð hjá einkaaðilum færu fyrst í skoðun og heildarmat á opinberri heilbrigðisstofnun, sem olli tvíverknaði og lengri biðtíma. Þeirri kröfu var aflétt í janúar 2026 og hefur það skilað bæði auknu hagræði og styttri biðtíma.

Einnig var unnið að því að bæta og einfalda upplýsingagjöf til notenda. Frá því í mars hafa skjólstæðingar getað fylgst með skráningu sinni á biðlista fyrir liðskiptaaðgerð á Mínum síðum á Ísland.is og hefur það mælst vel fyrir. Jafnt og þétt bætast við upplýsingar um bið eftir fleiri aðgerðum, til dæmis augnsteinaaðgerðum. Þá geta öll sem bíða eftir aðgerð á Landspítala nú nálgast sömu upplýsingar um sína skráningu.

Fyrir áhugasöm má finna mælaborð á vef Embættis landlæknis sem sýnir þróun biðtíma og fjölda liðskiptaaðgerða.