Skatturinn
Útreikningur vörugjalds af innfluttum ökutækjum
Vörugjöld eru lögð á skráningarskyld ökutæki sem eru innflutt eða framleidd á Íslandi. Það gildi jafnt um ný og notuð ökutæki.
Engin vörugjöld eru á ökutækjum sem ganga eingöngu fyrir rafmagni, metani eða vetni.
Útreikningur
Vörugjöld eru reiknuð út frá eftirfarandi:
Tollverði ökutækisins, sem samanstendur af innkaupsverði, flutningsgjaldi og flutningstryggingu. Vörugjöld geta verið á bilinu 10-70% af tollverði.
Losun koltvísýrings (CO₂ gildi) ökutækisins.
Ef CO₂ gildi er ekki skráð í skráningarskírteini ökutækisins eru vörugjöld reiknuð út frá þyngd.
Til að reikna vörugjald þarf að hafa upplýsingar um útblástur sem eru að finna á skráningarskírteini og gerðarviðurkenningu ökutækis.
Sjá reiknivél innflutningsgjalda.
Ökutæki undanþegin vörugjaldi að hluta eða öllu leiti
Lýsing ökutækis | Vörugjald |
|---|---|
Vélknúin ökutæki, sbr. 43. tölul. 1. mgr. 3. gr. umferðarlaga, nr. 77/2019. sem eru eingöngu knúin metani, rafmagni eða vetni. | 0 % |
Lýsing ökutækis | Vörugjald |
|---|---|
Hópferðabifreiðar sem skráðar eru fyrir 10 manns eða fleiri að meðtöldum ökumanni að leyfðri heildarþyngd 5 tonn eða meira. | 0 % |
Hópferðabifreiðar sem skráðar eru fyrir 10 manns eða fleiri að meðtöldum ökumanni að leyfðri heildarþyngd 5 tonn eða minna. Sömu ökutæki í eigu hópferða- eða sérleyfishafa eða í fjármögnunarleigu vegna fjármögnunarleigusamnings við hópferða- eða sérleyfishafa skulu bera 5% vörugjald. | 40 % |
Lýsing ökutækis | Vörugjald |
|---|---|
Vélknúin ökutæki til sérstakra nota, gálgabifreiðar, kranabifreiðar og fleira, sem ekki eru aðallega hönnuð til flutnings á mönnum eða vörum og ekki eru tilgreind annars staðar í þessari grein, að heildarþyngd yfir 5 tonn. | 0 % |
Dráttarvélar í ökutækjaflokki T1, T2 og T3 sem eru skráðar sem dráttarvélar í ökutækjaskrá, sbr. 10. tölul. 1. mgr. 3. gr. umferðarlaga, nr. 77/2019 og falla undir vörulið 8701 í tollskrá. | 0 % |
Kranabifreiðar og borkranabifreiðar sem eru 5 tonn eða minna að leyfðri heildarþyngd. | 20 % |
Yfirbyggingar, þar með talin ökumannshús fyrir vélknúin ökutæki. | 20 % |
Vélknúin ökutæki til sérstakra nota, gálgabifreiðar og fleira, sem ekki eru aðallega hönnuð til flutnings á mönnum eða vörum og ekki eru tilgreind annars staðar í þessari grein, að heildarþyngd 5 tonn eða minna | 20 % |
Lýsing ökutækis | Vörugjald |
|---|---|
Dráttarbifreiðar fyrir festivagna og sem aðallega eru gerðar til að draga annað ökutæki, sem eru yfir 5 tonn að heildarþyngd. | 0 % |
Vélknúin ökutæki í ökutækjaflokki N3, sem eru ætluð til vöruflutninga, eru yfir 12 tonn að heildarþyngd og falla undir vörulið 8704 í tollskrá | 0 % |
Tengivagnar og festivagnar til vöruflutninga sem eru yfir 5 tonn að leyfðri heildarþyngd. | 0 % |
Dráttarbifreiðar að heildarþyngd 4 tonn eða meira sem gerðar eru til nota utan þjóðvega. | 0 % |
Sjálfhlaðandi eða sjálflosandi tengivagnar og festivagnar til landbúnaðarnota. | 0 % |
Tengivagnar og festivagnar til vöruflutninga sem eru 5 tonn eða minna að leyfðri heildarþyngd, aðrir tengi- og festivagnar. | 20 % |
Dráttarbifreiðar fyrir festivagna sem aðallega eru gerðar til að draga annað ökutæki að heildarþyngd 5 tonn eða minna. | 20 % |
Sendibifreiðar með sambyggt stýrishús og flutningsrými, eftir atvikum búnar farþegasætum eða sætisfestingum fyrir allt að tvo farþega auk ökumanns í stýrishúsi en engum slíkum í farmrými og flutningsrými, sem eru ætlaðar til vöruflutninga og eru 5 tonn eða minni að leyfðri heildarþyngd. | 20 % |
Vélknúin ökutæki sem eru ætluð til vöruflutninga, eru yfir 5 tonn en 12 tonn eða minni að heildarþyngd og falla undir vörulið 8704 í tollskrá. | 20 % |
Lýsing ökutækis | Vörugjald |
|---|---|
Bifhjól samkvæmt skilgreiningu umferðarlaga og jafnframt stigin bifhjól, fjórhjól, sexhjól, körtur, golfbifreiðar og beltabifreiðar, þ.m.t. vélsleðar. | 40 % |
Lýsing ökutækis | Vörugjald |
|---|---|
Slökkvibifreiðar og sjúkrabifreiðar í eigu ríkis, sveitarfélaga eða stofnana á þeirra vegum. | 0 % |
Ökutæki í eigu erlendra sendiráða, sendiræðisskrifstofa og sendiræðismanna sé slíkt skylt samkvæmt milliríkjasamningum sem Ísland er aðili að. Sama gildir um alþjóðasamtök og alþjóðastofnanir sem hér eru. | 0 % |
Bifreiðar í eigu ríkis, sveitarfélaga eða stofnana á þeirra vegum eða fatlaðs fólks sem eru sérstaklega útbúnar fyrir fatlað fólk. Bifreiðarnar skulu búnar hjólastólalyftu eða öðrum sambærilegum búnaði og samþykktar af Sjúkratryggingum Íslands. | 0 % |
Ökutæki sem ætluð eru fyrir starfsemi björgunarsveita enda liggi fyrir staðfesting landssamtaka björgunarsveita á að viðkomandi ökutæki verði einungis notuð í þágu björgunarsveita. | 0 % |
Lýsing ökutækis | Vörugjald |
|---|---|
Beltabifreiðar (snjóbílar), yfir 700 kg að eigin þyngd, sérstaklega ætlaðar til aksturs í snjó. | 0 % |
Haffær ökutæki á hjólum fyrir láð og lög. | 0 % |
Lýsing ökutækis | Vörugjald |
|---|---|
Grindur með hreyfli og ökumannshúsi og eftir atvikum með viðbættu vöruflutningarými. Með viðbættu vöruflutningarými er átt við vörukassa eða vörupall sem ekki er sambyggður ökumannshúsinu og myndar ekki sjónræna heild með því hvað varðar lögun, lit eða efni. | 20 % |
Önnur vélknúin ökutæki sem ekki eru sérstaklega talin upp í þessum kafla. | 40 % |
Vörugjald, að hámarki 500.000 kr., skal falla niður af
sérsmíðuðum bifreiðum til keppni í rallakstri, sem skráðar eru sem slíkar,
ökutækjum sem ekki eru skráningarskyld og sérsmíðuð eru til nota í kvartmílukeppni
torfærugrindum til nota í torfærukeppni
Skilyrði niðurfellingar
Niðurfelling vörugjalds er háð því skilyrði að næstu sjö ár eftir nýskráningu bifreiðar verði eftirfarandi skilyrði uppfyllt:
Ökutæki skal ætlað til og einungis notað í aksturskeppnum sem haldnar eru í samræmi við reglur um akstursíþróttir og aksturskeppni og haldnar eru á ábyrgð og samkvæmt reglum samtaka um akstursíþróttir, þ.e. skipulagsbundinna samtaka sem hafa akstursíþróttir á verkefnaskrá sinni og hlotið hafa til þess viðurkenningu innanríkisráðuneytisins.
Við umsókn um niðurfellingu vörugjalds skal lagt fram vottorð frá framleiðanda bifreiðar ásamt rökstuddri yfirlýsingu samtaka um akstursíþróttir um að um sé að ræða sérsmíðaða keppnisbifreið til aksturskeppni í viðkomandi keppnisgrein. Ef ökutæki er ekki skráningarskylt skal leggja fram vottorð um það frá skráningarstofu ökutækja. Við mat á því hvort ökutæki sé sérsmíðað ökutæki til keppni í viðkomandi keppnisgrein skal m.a. litið til þess hvort ökutækið uppfylli þær kröfur sem samtök um akstursíþróttir gera til keppnisbifreiða. Varðandi sérsmíðaðar bifreiðar til keppni í rallakstri skal jafnframt litið til þess hvort bifreiðin uppfylli kröfur sem gerðar eru varðandi skráningu samkvæmt reglugerð um skráningu ökutækja.
Ef um sérsmíðaða bifreið til rallaksturs er að ræða skal hún skráð sem slík í ökutækjaskrá, samkvæmt reglugerð um skráningu ökutækja. Skráningarnúmer skulu vera í samræmi við ákvæði sömu reglugerðar.
Ökutækjum sem njóta niðurfellingar samkvæmt þessari grein er óheimilt að aka á vegum. Þó er heimilt að aka sérsmíðuðum rallbifreiðum á vegum vegna þátttöku í rallaksturskeppnum samkvæmt reglum um akstursíþróttir og aksturskeppni og til æfingaaksturs samkvæmt sömu reglum.
Ef brotið er gegn framangreindum skilyrðum skal Skatturinn innheimta fullt vörugjald, þ.e. mismun á fjárhæð vörugjalds sem greitt var og þeirri fjárhæð sem borið hefði að greiða ef ekki hefði komið til lækkunar vörugjalds.
Lögveð er í viðkomandi ökutæki fyrir ógreiddu vörugjaldi.
Hægt er að sækja um lækkun vörugjalds við innflutning ökutækis.
Reiknireglur vörugjalds á ökutæki
CO₂ gildi
Breytilegt er eftir ökutækjum hvernig losun koltvísýrings (CO₂-gildi) er skráð í ökutækjaskrá. Við útreikning er notað tiltækt CO₂ gildi eftir þessari forgangröð:
Vegið CO₂-gildi (mælt samkvæmt WLTP aðferð), sé það til staðar
CO₂-gildi (mælt samkvæmt WLTP aðferð), sé það til staðar
Vegið CO₂-gildi (mælt samkvæmt NEDC aðferð), sé það til staðar
CO₂-gildi (mælt samkvæmt NEDC aðferð), ef ekkert að ofangreindu er tiltækt.
Reikningsaðferð
Heiti vörugjalda sem reiknuð eru samkvæmt CO₂ gildi
Vörugjöldin bera kódana N1, N2 og N3. Við útreikning er eitt gjaldanna svo valið í samræmi við skráningu í ökutækjaskrá.
Útreikningur N1, N2 og N3 vörugjalda
Aðferðin við að velja og reikna út N1, N2 og N3 vörugjöldin er þessi:
Vörugjaldið N1:
0,34% á hvert gramm skráðrar koltvísýringslosunar umfram 15 grömm á hvern ekinn kílómetra skráðrar koltvísýringslosunar hafi losunin einvörðungu verið skráð samkvæmt evrópsku aksturslotunni (NEDC).
Vörugjaldið N2:
0,34% á hvert gramm skráðrar koltvísýringslosunar umfram 30 grömm á hvern ekinn kílómetra skráðrar koltvísýringslosunar hafi losunin einvörðungu verið skráð samkvæmt samræmdu prófunaraðferðinni (WLTP).
Vörugjaldið N3:
0,34% á hvert gramm skráðrar koltvísýringslosunar umfram 30 grömm á hvern ekinn kílómetra skráðrar koltvísýringslosunar samkvæmt samræmdu prófunaraðferðinni hafi losunin verið skráð samkvæmt samræmdu prófunaraðferðinni (WLTP) og evrópsku aksturslotunni (NEDC).
Um N1, N2 og N3 vörugjöldin gildir þó, að þau verða aldrei hærri en 70% af tollverði ökutækis.