Fjallað var um bið barna eftir geðheilbrigðisþjónustu í Talnabrunni embættis landlæknis. Þar kom fram að 2.651 barn var á biðlista eftir þjónustu hjá Geðheilsumiðstöð barna um síðustu áramót og hafði biðlistinn lengst nokkuð milli ára. Geðheilsumiðstöð barna er rekin af Heilsugæslu höfuðborgarsvæðisins en veitir þjónustu á landsvísu.

Í umfjöllun embættis landlæknis kemur fram að fjöldi barna í þjónustu hjá Geðheilsumiðstöð barna hefur þrefaldast gríðarlega frá því hún tók til starfa árið 2022. Þá fengu 1.339 börn þjónustu en í fyrra voru þau orðin 3.961. Þá hefur fjöldi viðtala, símtala og rafrænna samskipta við skjólstæðinga miðstöðvarinnar rúmlega þrefaldast á sama tímabili.

„Jákvætt er að bið eftir þjónustu hjá barna- og unglingageðdeild (BUGL), þar sem börn með flóknasta og alvarlegasta vandann fá þjónustu, hefur styst til muna undanfarin ár og er nú innan viðmiða embættis landlæknis um bið eftir heilbrigðisþjónustu. Hins vegar hefur bið eftir þjónustu hjá Geðheilsumiðstöð barna lengst mikið á sama tíma sem bendir til að vandinn hafi að einhverju leyti færst milli þjónustuaðila,“ segir í frétt á vef embættis landlæknis þar sem vakin er athygli á málinu.

Greiningarteymi eflt

„Það er mikið áhyggjuefni að börn þurfi að bíða lengi eftir þessari mikilvægu þjónustu,“ segir Íris Dögg Harðardóttur, framkvæmdastjóri geðheilbrigðisþjónustu hjá Heilsugæslu höfuðborgarsvæðisins. „Það hafa þegar verið stigin mikilvæg skref til þess að efla starfsemi greiningarteymisins hjá Geðheilsumiðstöð barna með auknum fjárveitingum og ráðningum á sérfræðingum.“

Hún segir ljóst að eftirspurnin eftir þjónustu sé mikil og þar hafi breytingar hjá einni stofnun áhrif á aðrar, eins og bent er á í umfjöllun embættis landlæknis. „Þegar þörfin er brýn finnur fólk sér farveg. Við þurfum að halda áfram að gæta þess að stofnanir vinni þétt saman að því að taka á vandanum og koma til móts við þennan stóra hóp barna sem þurfa sannarlega á þjónustu að halda.“

Svipuð þróun í nágrannalöndunum

Eftirspurn eftir greiningum hefur einnig fjölgað í nágrannalöndunum eins og fjallað er um í Talnabrunninum. Þar er meðal annars vísað í nýja skýrslu um geðheilsu barna og ungmenna á Norðurlöndunum. Þar kemur fram að þróunin skýrist líklega af samspili nokkurra þátta, svo sem aukinni meðvitund um vandann, minni fordómum, álagi í félagslegu umhverfi barnanna, betra aðgengi að greiningarferli og bættri skráningu í sjúkraskrá.