Persónuvernd og tjáning einstaklinga á netinu

Skrif

Persónuvernd getur almennt ekki fjallað um skrif einstaklinga á netinu, þar sem þau fela í sér tjáningu viðkomandi. Í slíkum málum reynir á mörk stjórnarskrárvarinna réttinda:

• tjáningarfrelsis annars vegar

• og friðhelgi einkalífs hins vegar

Þegar reynir á mörk stjórnaskrárvarinna réttindi einstaklinga er það dómstóla að leysa úr þeim ágreiningi. Flestum kvörtunum vegna tjáningar, þar með talið á samfélagsmiðlum, er því vísað frá Persónuvernd og málsaðilum leiðbeint um að bera ágreininginn undir dómstóla. 

Birting á gögnum

Ef einstaklingur birtir upplýsingar úr gögnum eða gagnagrunnum sem hafa að geyma persónuupplýsingar getur Persónuvernd í ákveðnum tilvikum fjallað efnislega um málið, þó að birtingunni fylgi tjáning af einhverju tagi.

Til dæmis getur Persónuvernd almennt fjallað um birtingu persónuupplýsinga, til dæmis. símanúmers, heimilisfangs, bankaupplýsinga eða heilsufarsupplýsinga um einstakling, jafnvel þó að þær birtist með texta þar sem einhver tjáir skoðanir sínar.

Þá er ekki fjallað um skrifin sjálf, heldur bara birtingu upplýsinganna sjálfra. Stundum eru þessi atriði þó svo nátengd að kvörtun yrði vísað frá, en Persónuvernd metur það í hverju tilviki fyrir sig.

Eigin gögn

Almennt séð máttu birta eigin gögn á Netinu, til dæmis bréf sem þú hefur skrifað, þó að þau varði aðra einstaklinga. Þau yrðu oftast talin fela í sér tjáningu á skoðunum þínum. Þetta getur þó þurft að meta í hverju tilviki fyrir sig. Einnig þarf að hafa í huga að birtingin gæti brotið gegn öðrum lögum en persónuverndarlögunum, en það er ekki hlutverk Persónuverndar að meta það. 

Gögn annarra

Það sama gildir hins vegar ekki um gögn frá öðrum einstaklingum, þau má almennt ekki birta nema viðkomandi samþykki birtinguna eða ef einhver önnur heimild í persónuverndarlöggjöfinni kemur til greina, til dæmis lögmætir hagsmunir.