Nám í tölvunarfræði er eitt það hagnýtasta sem völ er á.

Tölvunarfræðingar taka virkan þátt í þróun, hönnun, prófun, breytingu og forritun hugbúnaðar og starfa með fólki úr mörgum fagstéttum.

Uppbygging og rekstur nútímaþjóðfélags byggist í veigamiklum atriðum á hugbúnaði og námið miðar að því að nemendur verði færir um að þróa og reka traustan og skilvirkan hugbúnað.

Er námið fyrir þig?

• Hefur þú áhuga á að leysa flókin vandamál með tölvutækni?

• Langar þig að skilja hvernig gervigreind og máltækni í tölvum virkar?

• Langar þig að starfa með fólki úr mörgum fagstéttum?

• Vilt þú vinna fjölbreytt verkefni undir handleiðslu helstu sérfræðinga landsins í tölvunarfræði?

• Hefur þú gaman af því að forrita og hanna?

• Vilt þú geta valið úr fjölbreyttu úrvali námskeiða á þínu áhugasviði?

• Langar þig að eiga möguleika á krefjandi framtíðarstarfi?

Um hvað snýst námið?

Tölvunarfræðinám miðar að því að þú fáir góða undirstöðu í grundvallaratriðum tölvunarfræðinnar sem og skilning á gagnaskipan, reikniritum, forritunarmálum, netkerfum og gagnagrunnum. Námið miðar að því að þú verðir fær um að þróa og reka traustan og skilvirkan hugbúnað.

Þú færð góðan undirbúning til að takast á við ýmis verkefni atvinnulífsins. Færð traustan grunn til að bæta stöðugt við þekkingu þína og bregðast við hraðri framþróun á fagsviðinu.

Námið er eitt það hagnýtasta sem völ er á.

Skyldunámskeið eru um tveir þriðju hlutar námsins. Afganginn má velja innan tölvunarfræði eða úr öðrum fræðigreinum.

Í boði eru eftirfarandi kjörsvið:

• Almenn tölvunarfræði (Veitir breiðan almennan grunn í tölvunarfræði)

• Gagnavísindi (Nemendur fá þjálfun í vinnslu, greiningu og framsetningu á gögnum, auk líkangerðar og smíði reiknirita.)

• Reiknifræði (Gerir nemendur hæfa til þess að takast á við reiknifræðilega líkanagerð og fræðilegri þætti tölvunarfræði)

Allir nemendur taka sömu kjarnanámskeið en námskeiðaúrval greinist á milli kjörsviða.

Meðal viðfangsefna

• Hönnun, greining og notkun forritunarmála

• Reiknirit

• Þróun hugbúnaðar

• Smíði tölvuviðmóta

• Tölvugrafík og leikjaforritun

• Vefforritun

• Greining, hönnun og notkun gagnamóta og gagnasafnskerfa

• Stýrikerfi

• Tölvunet og dreifð kerfi

• Tölvuöryggi

• Skýjaforritun og forritun ofurtölva

• Gervigreind

• Reiknifræði og bestun

• Fræðileg tölvunarfræði

• Stærðfræði

• Máltækni

• Lífupplýsingafræði

Annað

• Einnig er hægt að taka þetta nám sem 120 eininga aðalgrein með 60 eininga aukagrein í öðru fagi.