Þroskaþjálfafræði til starfsleyfis er viðbótarnám fyrir þau sem hafa lokið BA-prófi í þroskaþjálfafræði og vilja öðlast starfsréttindi sem þroskaþjálfi. Í kjarnanámskeiðum er lögð áhersla á hagnýta vettvangstengingu og munu nemendur stunda vettvangsnám á starfsviði sem tengist því kjörsviði sem valið er.

Er námið fyrir þig?

• Ert þú með BA gráðu í þroskaþjálfafræði?

• Langar þig að öðlast starfsheitið þroskaþjálfi?

• Er þér umhugað um mannréttindi fatlaðs fólks?

• Vilt þú geta starfað á jafnréttisgrunni með fólki á öllum sviðum samfélagsins?

Um hvað snýst námið?

Nám til starfsréttinda í þroskaþjálfafræði miðar að því að nemendur öðlist þekkingu og hæfni til þess að veita heildræna þjónustu og ráðgjöf í þeim tilgangi að styðja við fullgilda samfélagsþátttöku, mannréttindi, sjálfræði og lífsgæði fólks sem þarfnast stuðnings til lengri eða skemmri tíma.

Í þessu hlutverki eru nemendur búnir undir að starfa í þverfaglegu umhverfi við að fjarlægja samfélagslegar hindranir sem koma í veg fyrir að fólk njóti fullra mannréttinda. Þannig býr námið nemendur undir það að starfa á jafnréttisgrunni með fólki á öllum sviðum samfélagsins.

Uppbygging náms

Námið er 60 einingar og er skipulagt sem fullt nám til eins árs.

Námið skiptist í:

• Skyldunámskeið, 50 einingar

• Frjálst val 10 einingar

Nemendur velja á milli eftirfarandi kjörsviða:

• Heildstæð menntun og ævinám

• Sjálfræði og sjálfstætt líf

Í kjarnanámskeiðum kjörsviða er lögð áhersla á hagnýta vettvangstengingu og munu nemendur stunda vettvangsnám á starfsviði sem tengist því kjörsviði sem valið var.

Fyrirkomulag kennslu

Kennsla og próf fara fram á íslensku.

Meginmarkmið

Námið miðar að því að nemendur öðlist þekkingu og hæfni til þess að veita heildræna þjónustu og ráðgjöf í þeim tilgangi að styðja við fullgilda samfélagsþátttöku, mannréttindi, sjálfræði og lífsgæði fólks.

Annað

Þau sem ljúka viðbótardiplómu í þroskaþjálfafræðum til starfsleyfis geta sótt um starfsleyfi þroskaþjálfa til Embættis landlæknis.

Viðbótardiplóma veitir ekki sjálfkrafa aðgang að frekara námi, en mögulegt er að sækja um að fá einingarnar metnar upp í meistaranám í þroskaþjálfafræði.

• Þroskaþjálfafræði, 120 eininga MA nám