MS nám í vélaverkfræði er tveggja ára framhaldsnám við Iðnaðarverkfræði-, vélaverkfræði- og tölvunarfræðideild Verkfræði- og náttúruvísindasviðs Háskóla Íslands.

Að loknu meistaraprófi í vélaverkfræði geta nemendur sótt um leyfi til iðnaðarráðherra til að geta kallað sig verkfræðinga.

Er námið fyrir þig?

• Vilt þú auka þekkingu þína á umhverfinu, endurnýtingu og sjálfbærni?

• Langar þig að leita lausna, hanna vörur og verkferla sem bæta samfélagið?

• Vilt þú læra meira um orku, framleiðslu hennar og nýtingu á sjálfbæran hátt?

• Hefur þú áhuga á að gera heiminn betri en hann er?

Um hvað snýst námið?

Í meistaranámi í vélaverkfræði vinna nemendur að stóru rannsóknarverkefni sem oft er unnið í samstarfi við fyrirtæki sem getur greitt leið nemenda að starfi að námi loknu. Öflugar rannsóknir, sterk tengsl við atvinnulífið og alþjóðleg tengsl tryggja að verkefni sem nemendur glíma við í náminu eru raunhæf og byggjast á nýjustu þekkingu.

Uppbygging náms

Námið er 120 einingar og er skipulagt sem fullt nám til tveggja ára.

Námið skiptist í:

• Námskeið, 60 - 90 einingar

• Rannsóknarverkefni, 30 - 60 einingar

Kjörsvið

Val er á milli eftirfarandi kjörsviða:

• Vélaverkfræði

• Endurnýjanleg orka - jarðhitaverkfræði

Flest eða öll námskeið eru valnámskeið og eru þau valin í samráði við umsjónarkennara eftir áhugasviði hvers og eins nemanda.

Fyrirkomulag kennslu

Námið er kennt á íslensku en námsefni er almennt á ensku.

Ýmsir möguleikar eru á styrkjum fyrir meistaranema og góð vinnuaðstaða er fyrir hendi.

Meginmarkmið

Meðal annars er miðað að því að nemendur öðlist þekkingu og hæfni til að greina og leysa flókin vandamál á hinum ýmsu sérhæfðu sviðum innan vélaverkfræðinnar. Nemendur munu temja sér sjálfstæða og skapandi hugsun við lausn vandamála og geta lokið greiningu þannig að niðurstöður séu skýrar.

Nemendur öðlist skilning á nýjustu þekkingu innan vélaverkfræði.

Annað

Að loknu meistaraprófi í vélaverkfræði geta nemendur sótt um leyfi til iðnaðarráðherra til að geta kallað sig verkfræðinga. Starfsheitið er lögverndað.

Meistaragráða í vélaverkfræði opnar möguleika á doktorsnámi

• Sjá doktorsnám í vélaverkfræði

• Sjá allt doktorsnám við Verkfræði- og náttúruvísindasvið HÍ.