Háskólanám

Viðbótardiplóma í kennslufræði er stutt 30 eininga nám ætlað háskólakennurum, stundakennurum og doktorsnemum. Námið dýpkar þekkingu á kennslufræði, námsmati og endurgjöf og eykur færni kennara til þess að takast á við kennsluáskoranir samtímans.

Námið hentar vel með vinnu.

Er námið fyrir þig?

• Er háskólakennsla partur af þínu starfi?

• Viltu bæta við þig þekkingu í kennslufræðum háskóla?

• Langar þig að geta byggt upp gott námsmat og endurgjöf?

• Hefur þú áhuga á að þróa þín námskeið?

• Viltu öðlast góða þekkingu á miðlunarleiðum í námi?

Um hvað snýst námið?

Námsleiðin er skipulögð í samstarfi við Kennslumiðstöð og er sniðin að starfandi háskólakennurum, doktorsnemum og öðrum sem kenna í háskólum á grundvelli sérfræðiþekkingar sinnar.

Með námsleið í kennslufræði háskóla er Háskóli Íslands að bregðast við þörfum háskólakennara fyrir aukna þekkingu og færni á sviði kennslufræða.

Háskólakennarar búa yfir mikilli þekkingu innan sinna sérsviða en hafa sjaldan þá sérþekkingu á námi og kennslu sem æskileg er til að skipuleggja kennslu, stýra námi nemenda og leggja á það mat. Slík kunnátta er mikilvæg í ljósi þess að nemendahópur háskólastigsins verður æ fjölbreyttari, kröfur til kennara um notkun upplýsingatækni meiri og gæði háskóla eru í auknum mæli metin út frá gæðum kennslu.

Uppbygging náms

Námið er 30 einingar og er skipulagt sem hluta nám til allt að tveggja ára.

Skyldunámskeið á námsleiðinni:

• Inngangur að kennslufræði á háskólastigi, 10 einingar

• Námsmat og endurgjöf, 5 einingar

• Skipulag og endurskoðun námskeiða, 5 einingar

• Kennsluþróun og starfendarannsóknir, 10 einingar

Viðfangsefni

Meðal þess sem fjallað er um eru:

• skilgreining hæfniviðmiða

• samhæft námsskipulag

• tengsl hæfniviðmiða og námsmats

• kennsluþróun og leiðir til að leggja mat á gæði námskeiða

Fyrirkomulag kennslu

Námið er kennt á íslensku.

Námið er skipulagt þannig að þátttakendur vinna að því samhliða störfum sínum. Auk þátttöku í tímum vinna þátttakendur ýmis verkefni tengd eigin kennslu.

Meginmarkmið

Er að þátttakendur öðlist góðan skilning á lykilhugtökum náms, kennslu og námsmats á háskólastigi.

Annað

Frekari upplýsingar um námsleiðina veitir Kennslumiðstöð

Háskóli Íslands styður við fastráðna kennara sem sækja námsleiðina með því að veita þeim styrk úr Kennslumálastjóði fyrir skrásetningargjaldi við skólann.