Háskólanám

Meistaranám í þroskaþjálfafræði veitir þeim sem lokið hafa BA-námi í þroskaþjálfafræði tækifæri til að dýpka þekkingu og auka færni á fjölbreytilegu fag- og fræðasviði og kynnast nýjum áherslum og leiðum í rannsóknum og þjónustu. Nemendur þjálfast í að greina viðfangsefni og takast á við álitamál og áskoranir á fræðilegum grunni og út frá félagslegum skilningi á fötlun og margbreytileika. Fjarnám.

Er námið fyrir þig?

• Ert þú með BA gráðu í þroskaþjálfafræði?

• Vilt þú dýpka þekkingu þína í fræðunum?

• Vilt þú fræðast um nýjar áherslur og leiðir í þjónustu sem fagstéttin veitir?

• Langar þig í framhaldsnám?

Um hvað snýst námið?

Í meistaranámi í þroskaþjálfafræði er lögð áhersla á að nemendur dýpki þekkingu og skilning á helstu stefnum, rannsóknum og kenningum í þroskaþjálfafræði og á öðrum fræðasviðum er leggja grundvöll að störfum fagstéttarinnar.

Nemendur kynnast nýjum íslenskum og erlendum rannsóknum á fræðasviðinu. Einnig er fjallað um nýjar áherslur og leiðir í þjónustu sem fagstéttin veitir úti á vettvangi og þeim áskorunum sem hún stendur frammi fyrir á hverjum tíma.

Í náminu er gengið út frá félagslegum skilningi á fötlun og margbreytileika og áhersla er lögð á að nemendur þjálfist í beitingu mannréttindasjónarhorns við að greina stöðu fatlaðs fólks og annarra jaðarhópa. Nemendur kynnast rannsóknarleiðum sem nýtast við rannsóknir á sviði þroskaþjálfafræða.

Uppbygging náms

Námið er 120 einingar og er skipulagt sem fullt nám til tveggja ára. Einnig er hægt að stunda hlutanám í þrjú til fjögur ár.

Nemendur velja á milli eftirfarandi kjörsviða:

• Rannsóknarmiðað MA-nám

Í rannsóknarmiðuðu námi er nemendum gefinn kostur á að sérhæfa sig í rannsóknum á vettvangi fatlaðs fólks. Nemendur dýpka þekkingu sína í rannsóknum og fræðistörfum t.d. í þeim tilgangi að undirbúa sig undir doktorsnám. Lokaverkefni er 40 einingar.

• Starfsmiðað MA-nám

Í starfstengdu meistaranámi geta nemendur sérhæft sig á tilteknum sviðum sem eru annars vegar þroskaþjálfafræði með áherslu á þjónustu við fullorðna og aldraða og hins vegar með áherslu á þjónustu við fötluð börn og ungmenni.Lokaverkefni er 30 einingar.

Námið skiptist í:

• Skyldunámskeið eru að lágmarki 60 einingar, þar af aðferðafræði 10-20 einingar

• Lokaverkefni 30-40 einingar

• Val 10-20 einingar

Fyrirkomulag kennslu

Kennsla og próf fara fram á íslensku.

Meginmarkmið

Meginmarkmið námsins er að nemendur upplifi sig að námi loknu sem sterka fagmenn sem byggja starf sitt á framsæknum fræðilegum grunni.

Annað

Einnig er boðið upp á:

• 30 eininga viðbótardiplóma í þroskaþjálfafræði

• 60 eininga viðbótardiplóma í þroskaþjálfafræði til starfsleyfis

Námið veitir aðgang að doktorsnámi

• Menntavísindi, Ph.D.,180-240e (tímaritsgreinar eða ritgerð)

• Menntavísindi, Ed.D., 180e