Umhverfis- og byggingarverkfræðingar þróa og hanna hagkvæmar lausnir sem tryggja öryggi og stuðla að jákvæðum áhrifum á heilsu og umhverfi. Grunnnám í umhverfis- og byggingarverkfræði er þriggja ára nám sem lýkur með BS gráðu. Til að öðlast réttindi til starfsheitisins verkfræðingur þarf einnig að ljúka meistaraprófi.

Er námið fyrir þig?

• Vilt þú tryggja fólki öruggt neysluvatn?

• Vilt þú hanna örugg mannvirki?

• Vilt þú vinna fjölbreytt verkefni undir handleiðslu helstu sérfræðinga landsins í umhverfis- og byggingaverkfræði?

• Hefur þú gaman af raungreinum?

• Vilt þú geta valið úr fjölbreyttu úrvali námskeiða á þínu áhugasviði?

• Langar þig að eiga möguleika á krefjandi framtíðarstarfi?

Um hvað snýst námið?

Nám í umhverfis- og byggingarverkfræði byggir á haldgóðri þekkingu í stærðfræði, raungreinum, íslensku og ensku.

Grunnnámið spannar mörg fagsvið. Meðal fagsviða eru mannvirkjahönnun, umhverfisverkfræði, vatna- og straumfræði, skipulag og samgöngur, og jarðtækni og grundun.

Með valnámskeiðum er hægt að leggja áherslu á annað hvort:

• Byggingarverkfræði

• Umhverfisverkfræði

Á fyrstu tveimur árunum tekur þú skyldunámskeið með áherslu á stærðfræði og eðlisfræði og verkfræði.

Verkefnavinna er mikilvægur hluti námskeiða og farið er í vettvangsferðir til að skoða áhugaverð mannvirki.

Meðal viðfangsefna

• Hönnun mannvirkja

• Hönnun vatns- og fráveitna

• Sjálfbær þróun byggðar

• Mat á umhverfisáhrifum

• Hönnun vatns- og vindorkumannvirkja

• Jarðskjálftaverkfræði

• Jarðtækni og grundun

• Samgönguverkfræði

• Áhættumat og lausnir sem lágmarka tjón

• Stjórnun framkvæmda