Að búa til sitt eigið starf með Frumkvæði

Umsókn í Frumkvæði

Um verkefnið

Frumkvæði er verkefni fyrir þau sem eru á atvinnuleysisskrá og vilja skapa sér eigið starf og fara út í eigin rekstur.

Þátttakendur fá fræðslu og leiðsögn, kanna þörf fyrir væntanlega þjónustu eða vörur sínar á markaði og gera viðskiptaáætlun um viðkomandi verkefni. Þannig geta þeir metið hvort verkefnið sé raunhæft og hvað þurfi til svo að unnt sé að búa til starf.

Lengd verkefnis

Verkefnið er í heildina 6 mánuðir en hægt er að stytta verkefnið ef þátttakandi óskar eftir því.

Fræðsla

Fræðslan stendur yfir í þrjá mánuði. Þátttakendur fá aðgang að fræðsluefni á vefnum um gerð viðskiptáaætlana. Fræðsluefnið er í formi fyrirlestra á netinu, þeir eru á íslensku en hver þáttur er textaður á ensku.

Ennfremur fá þátttakendur handleiðslu og ráðgjöf í hverri viku, frá handleiðara og frá starfsfólki Frumkvæðis þar sem meðal annars er farið í viðskiptaáætlanir, kynningar, fyrirtækjaform og ferlið við að stofna fyrirtæki.

Vinnustofa

Þátttakendur hittast á vinnustofu eða í fyrirtækjasmiðju á viku fresti í allt að 12 skipti. Þeir skuldbinda sig til að mæta í fyrirlestra einu sinni til tvisvar í viku, taka virkan þátt, vinna að viðskiptaáætlun sinni jafnt og þétt og kynna hana fyrir hópnum.

Kynningarnar samanstanda af:

einni 1 mínútna lyfturæðu,
fjórum 1 mínútna stöðuskýrslum,
tveimur 5 mínútna fjárfestakynningum með glærum.

Mikil áhersla er á jafningjafræðslu sem þýðir að þátttakendur gefa hver öðrum endurgjöf eftir kynningar.

Framhald

Eftir þrjá mánuði þurfa þátttakendur að skila inn 6-12 blaðsíðna viðskiptaáætlun til Vinnumálastofnunar sem kallar þá á fund til að fara yfir áætlunina, stöðu verkefnis og framhald þess.

Að umsækjandi eigi rétt á atvinnuleysisbótum og búið sé að úrskurða um það og eigi að minnsta kosti 6 mánuði eftir af bótarétti sínum.
Að viðskiptahugmyndin sé talin líkleg til að skapa atvinnuleitanda framtíðarstarf að mati ráðgjafa.
Að atvinnuleitandi sé reiðubúinn að kynna sér rekstur og stofnun fyrirtækja.
Að atvinnuleitandi sé ekki með opna launagreiðendaskrá eða rekstur á eigin kennitölu þegar sótt er um Frumkvæði.
Að umsækjandi greini satt og rétt frá högum sínum. Rifta má samningi ef atvinnuleitandi greinir ekki rétt frá högum sínum, verði breyting á stöðu umsækjanda eða ekki eru taldar líkur á að verkefnið skili tilætluðum árangri. Áður en samningi er rift skal atvinnuleitanda gefinn kostur á að koma á framfæri við Vinnumálastofnun mati sínu á árangri verkefnisins.
Sé umsækjandi þátttakandi í öðru úrræði sem stangast á við verkefnið sem sagt starfsþjálfun eða ef viðkomandi hefur fengið biðtíma vegna uppsagnar, er heimilt að hafna umsækjanda.

Í lok verkefnis

Þau sem fá samþykkta 6 mánuði þurfa í lok verkefnis að skila inn lokaskýrslu og mæta á lokafund hjá ráðgjöfum Frumkvæðis. Þar þurfa þau einnig að staðfesta hvort farið sé alfarið af atvinnuleysiskrá og í vinnu hjá fyrirtækinu, farið í hlutastarf eða hætt við hugmyndina.

Ef hætt er við viðskiptahugmyndina eða í verkefninu þarf að skrifa undir yfirlýsingu um að viðkomandi muni ekki hefja rekstur án þess að tilkynna um það til Vinnumálastofnunar.

Ná í yfirlýsingu vegna reksturs eða verktakavinnu

Hægt er að senda tilkynninguna á netfangið: frumkvaedi@vmst.is

Umsóknarferli

Tekið er á móti umsóknum rafrænt frá 1. til 31. hvers mánaðar. Umsóknir eru metnar og afgreiddar fyrir 15. næsta mánaðar og fá allir umsækjendur tölvupóst um afgreiðsluna.

Alla jafna hefst fræðslan í þar næsta mánuði.

Dæmi: umsóknir sem berast í september eru afgreiddar í október og hefst þá fræðslan í nóvember.

Staðfesta atvinnuleit

Atvinnuleitendur þurfa að staðfesta atvinnuleit í hverjum mánuði á Mínum síðum milli 20. - 25. á hefðbundinn hátt en eru samt undanþegnir atvinnuleit á meðan á verkefni stendur og reynt er á viðskiptahugmyndina.

Hægt er að senda fyrirspurnir á ráðgjafa Frumkvæðis á netfangið: frumkvaedi@vmst.is