Samtök iðnaðarins, fyrir hönd Málms, samtaka fyrirtækja í málm- og skipaiðnaði, hafa óskað eftir að iðngreinin kæli- og frystivélavirkjun verði löggilt. Ástæður þess eru að Tækniskólinn hefur unnið að gerð nýrrar námsbrautar í kæli og frystivélavirkjun á grundvelli styrks frá framfararsjóði Samtaka iðnaðarins vegna mikils skorts á faglærðu starfsfólki í kælitækni og ákalls frá iðnaðinum. Núverandi framsetning reglugerðarinnar, þar sem kælitækni- og frystivélavirkjun er sérgrein undir vélvirkjun, kemur í veg fyrir að námsbrautin verði opnuð.

Með fyrirhugaðri reglugerðarbreytingu er ráðuneytið að bregðast við ákalli frá atvinnulífinu vegna þarfar á starfsfólki með hæfni og fagþekkingu til að starfa á sviði kæli- og frystivélavirkjunar.