Frá árinu 2009 hafa kaup á vændi varðað refsingu samkvæmt almennum hegningarlögum en ekki hefur tekist að uppræta það hér á landi. Lögregla telur vændi að mestu drifið áfram af skipulagðri glæpastarfsemi og grunur er um að stór hluti þeirra kvenna sem auglýstar eru í vændi séu þolendur mansals.

Í framkvæmd varða vændiskaup sektum nema um ítrekuð brot sé að ræða og því hyggst dómsmálaráðherra endurskoða refsiramma ákvæða 1. og 2. mgr. 206. gr. almennra hegningarlaga út frá þeim tilgangi ákvæðanna að draga úr eftirspurn eftir vændi. Markmiðið er að draga úr eftirspurn eftir vændi, mansali í kynferðislegum tilgangi og skipulagðri glæpastarfsemi.

Áformaskjal og frummat á áhrifum lagasetningar fylgir málinu.