Með skólaheilsugæslu skal tryggja að börn og fjölskyldur þeirra njóti gagnreyndrar heilbrigðisþjónustu í formi reglubundinna heilbrigðisskoðana, heilbrigðisfræðslu, forvarna, ráðgjafar og heilsueflingar.

Markmið reglugerðarinnar er að skýra réttindi barna og hlutverk skólaheilsugæslu með þeim ávinningi að stuðla að heildstæðari þjónustu fyrir börnin, auka forvarnir, styrkja snemmtæka íhlutun, jafnt aðgengi og samfellu í þjónustu.

Við vinnu reglugerðarinnar var litið til nágrannalanda til samanburðar og þá sérstaklega til Finnlands sem hefur verið í fararbroddi Norðurlanda með skipulag og umgjörð skólaheilsugæslu og samþættingu við skólaþjónustu.

Heilbrigðisráðuneytið vinnur áfram að frekari stefnumörkun vegna skólaheilsugæslu í samráði við hagaðila. Á þessu ári verður áhersla lögð á samþætta stefnu og áætlanagerð fyrir þjónustu skólaheilsugæslu í grunnskólum og í framhaldsskólum.

Áætlað er að frekari ákvæði reglugerðarinnar verði útfærð samhliða slíkri vinnu.