Áformuð er lagasetning til innleiðingar á reglugerð (ESB) 2025/2075, um breytingu á reglugerð (ESB) nr. 909/2014 að því er varðar styttingu uppgjörstíma í Sambandinu (T+1). Gerðin verður innleidd með breytingum á lögum um verðbréfamiðstöðvar, uppgjör og rafræna eignarskráningu fjármálagerninga, nr. 7/2020.

Með uppgjörstíma er átt við tímann frá degi viðskipta með fjármálagerninga (T) til afhendingar þeirra. Meginreglan er nú T+2 á Evrópska efnahagssvæðinu, en frá október 2027 verður hún T+1. Breytingunni er ætlað að styrkja samkeppnishæfni Evrópu gagnvart öðrum markaðssvæðum. Heildaráhrif styttingar eru talin verða til góðs og til þess fallin að draga úr áhættu, ekki síst mótaðila-, uppgjörs- og kerfisáhættu. Skemmri uppgjörstími getur þó einnig falið í sér áskoranir og áhættu, sem mæta þarf með viðeigandi hætti. Breytingin krefst aðlögunar ferla og uppfærslu fjármálainnviða sem við sögu koma í eftirviðskiptum, með tilheyrandi áskorunum við samhæfingu þvert á ólíka innviði og starfsemi. Umbætur á kerfum og ferlum geta orðið kostnaðarsamar, en aukin skilvirkni verður markaðnum jafnframt til hagsbóta. Fyrirhuguð lagasetning mun einkum hafa áhrif á verðbréfamiðstöðvar, útgefendur, aðrar fjármálastofnanir og rekstraraðila markaðsinnviða, fjárfesta og Seðlabanka Íslands. Óhjákvæmilegt er að undirbúa breytinguna vel og tímanlega. Seðlabankinn leiðir þá vinnu hér á landi og gerir ráð fyrir virku samstarfi við markaðsaðila og -innviði. Núverandi áætlanir gera ráð fyrir tillögugerð um gildistöku breytingarinnar á sama eða svipuðum tíma í EFTA-ríkjunum á EES-svæðinu og í ríkjum Evrópusambandsins.

Tímasetning tillögugerðar um innleiðingu gerðarinnar hér á landi mun meðal annars ráðast af framvindu ferlis upptöku hennar í EES-samninginn. Stefnt er að því að innleiða hana samhliða CSDR Refit-gerðinni, þ.e. reglugerð (ESB) 2023/2845 (með vísan í tengt mál).