Reglugerðin er sett á grundvelli 8. og 19. gr. laga um landgræðslu nr. 155/2018 og 7. gr. og IV. kafla laga um skóga og skógrækt nr. 33/2019. Markmið reglugerðarinnar er að hvetja til og styrkja verkefni og framkvæmdir einstaklinga, sveitarfélaga, félagasamtaka, fyrirtækja og annarra sem vinna að vernd og endurheimt vistkerfa, landgræðslu og skógrækt.

Með setningu reglugerðarinnar er verið að samræma og sameina stuðningskerfi í landgræðslu og skógrækt. Þannig er komið á heildstæðum ramma fyrir úthlutun styrkja sem stuðlað geti að einfaldari stjórnsýslu, skýrari reglum og auknu gagnsæi.

Í reglugerðardrögum er meðal annars að finna upptalningu styrkhæfra verkefna sem mörg hver hafa hlotið stuðning ríkisins til margra ára, eins og varnir gegn landbroti, landgræðslu, skógrækt, endurheimt vistkerfa og skjólbelti til að bæta skilyrði til landbúnaðar. Þau nýmæli eru að bæst hafa við þrír verkefnaflokkar sem eru i) verndun kolefnisríkra vistkerfa, ii) gerð heildstæðra landnýtingaráætlana og iii) fræðsla, vöktun og samfélagsverkefni.

Land og skógur annast framkvæmd reglugerðarinnar samkvæmt drögunum.