Markmið frumvarpsins verður að laga íslenska háskólakerfið að alþjóðlegri þróun, efla gæði háskólanáms og rannsókna og nýta betur það opinbera fé sem veitt er til fjármögnunar háskólastigsins. Í því skyni verður í frumvarpinu lagt til að veita opinberum háskólum heimild til að innheimta skólagjöld fyrir nemendur utan EES svæðisins, líkt og gert er í sjálfstætt starfandi háskólum hér á landi sem og í háskólum nágrannalandanna. Nemendur frá löndum utan ESS svæðisins, verði almennt teknir út úr fjármögnunarlíkani háskólanna, en þess í stað fái opinberir skólar heimild til að innheimta skólagjöld fyrir þá nemendur, sem svari að minnsta kosti áætluðum kostnaði við nám á tiltekinni námslínu. Samhliða þessu verði teknir upp námsstyrkir fyrir afburðanemendur frá löndum utan EES svæðisins í þeim tilgangi að efnilegir nemendur hafi áfram tækifæri til náms hér á landi, óháð efnahag. Þessi breyting fæli ekki í sér skerðingu á heildarfjármögnun hins opinbera til háskólamála, heldur myndi sú fjármögnun nýtast betur í þá átt að auka gæði í háskólastarfi og veita góða þjónustu við nemendur.