Reglugerðardrögin eru samin í heilbrigðisráðuneytinu. Með þeim er stefnt að því að takmarka heimildir til að veita tilteknar meðferðir til útlitsbreytinga, sem eru án læknisfræðilegs tilgangs, við tilteknar löggiltar heilbrigðisstéttir.

Drög að reglugerð voru send í samráð sem lauk 22. nóvember 2023 og bárust 33 umsagnir. Eftir framangreint samráð og vinnu innan ráðuneytisins hafa verið gerðar töluverðar breytingar á reglugerðardrögunum. Helsta breytingin lýtur að gildissviði reglugerðarinnar en samkvæmt drögunum er það takmarkað við meðferðir þegar lækningatæki, þ.e. efni, efnasamsetningar eða hlutir, er notað til andlits-, húð eða slímhúðarfyllingar með því að sprauta því undir húð, í slímubeð eða leðurhúð eða sett inn á annan hátt. Með öðrum orðum falla undir reglugerðina meðferðir sem fela í sér að fylliefnum er sprautað í húð en séu slíkar meðferðir ekki gerðar rétt getur það haft alvarlegar afleiðingar í för með sér. Aðrar andlits- og húðmeðferðir sem eru taldar hættuminni, s.s. húðslípun, örnálameðferðir ásamt meðferðum sem framkvæmdar eru með lasertækjum og falla undir reglugerð nr. 171/2021 falla því utan við reglugerðina.

Í reglugerðinni er enn lagt til að þeir aðilar sem teljist bærir að veita meðferðirnar séu annars vegar læknar með sérfræðileyfi frá embætti landlæknis í húðlækningum og lýtalækningum og hins vegar læknar, tannlæknar og hjúkrunarfræðingar, hafi þeir aflað sér fullnægjandi þekkingar og hæfni til að veita meðferðina. Miðað er við þessar þrjár stéttir á þeim faglega grundvelli að þær hafi fullnægjandi menntun í líffærafræði (e. anatomy) og þjálfun í að sprauta undir húð.

Sá sem veitir meðferð skal hafa gilt starfsleyfi, veita meðferðina á heilbrigðisstofnun eða starfsstofu heilbrigðisstarfsmanns og hafa gilda tryggingu á grundvelli laga um sjúklingatryggingu, sem nær til meðferðarinnar. Þá er lagt til að embætti landlæknis geri tillögur til ráðherra að faglegum lágmarkskröfum til reksturs heilbrigðisþjónustu á sviði meðferða sem reglugerðin tekur til. Þá er í reglugerðinni kveðið á um upplýsingaskyldu meðferðarveitanda og samþykki sjúklings, óheimilar meðferðir, eftirlit og viðurlög.