Undanfarin ár hefur Lyfjastofnun Evrópu unnið að lausn til að auðvelda miðlun upplýsinga milli lyfjayfirvalda og fyrirtækja sem vinna að þróun lyfja sem nýst gætu í Evrópu. Vefurinn var nefndur IRIS með vísun í gríska goðafræði og heiti plöntu sem hefur frá fornu fari verið notuð í lækningaskyni.

Markmið þessa kerfis er að miðla upplýsingum stafrænt á öruggan hátt, gera ferla sjálfvirkari og auðvelda miðlæga samvinnu. Sérstaklega er mikilvægt að samnýta þá vísindalegu þekkingu sem annars væri dreifð, lyfjanotendum í Evrópu til heilla.

IRIS hefur verið tekin í notkun í þrepum og nú er meðal annars hægt að nýta kerfið til að miðla upplýsingum varðandi lyf fyrir börn, úttektir á framleiðslu- og rannsóknarsætum, vísindaráðgjöf, samhliða innflutning, breytingar á lyfjaskráningum bæði fyrir menn og dýr, og umsóknir fyrir fágæt lyf (e. Orphan medicines).

Frá því í janúar á þessu ári hefur EMA keyrt nærri alla vinnu sem á sér stað eftir að markaðsleyfi hefur verið veitt í gegnum IRIS. Þar með er talið viðhald á miðlægt skráðum lyfjum, auk þeirrar vinnu sem EMA fer fyrir og tengist lyfjum sem ekki eru miðlægt skráð, vinnu á borð við viðhald öryggisupplýsinga (PSUR og PASS), og málskot (referrals). Þeim sem þurfa aðgang að IRIS er bent á að leggja inn beiðni á skráningarsíðu EMA.

• IRIS