Markmið námskeiðsins er að aðstoða þátttakendur að byggja upp heilbrigða daglega lífshætti sem styðja við eðlilega þyngdarstjórn líkamans.
Stefnt er að því að í lok námskeiðsins hafi hver þátttakandi í höndum bjargráð og þekkingu til að setja sér raunhæf markmið.
Námskeiðið er opið öllum kynjum, 18 ára og eldri.

Efni námskeiðsins

Námskeiðið er fjögur skipti og skiptist í:

1. Þyngdarstjórnunarkerfi líkamans

Fjallað er um hvernig daglegar venjur, mataræði, hreyfing, svefn og andleg líðan vinna saman að heilbrigðum grunni.

• Hvernig þyngdarstjórnunarkerfi líkamans vinna.

• Hvernig er hægt að koma betra jafnvægi á mataræði, hreyfingu, svefn og andlega líðan

• Hvenær verður ofþyngd að sjúkdómnum offitu?

Leiðbeinendur: Íris Dröfn Björnsdóttir og Sigrún Kristjánsdóttir, hjúkrunarfræðingar.

2. Andleg líðan og svefn

Tengsl andlegrar heilsu og þyngdarstjórnunar.

• Bjargráð: Aðferðir til að takast á við streitu og erfiðar tilfinningar.

• Svefn: Áhrif svefns á líkamann og þyngdarstjórnun, helstu svefnraskanir og ráð við svefnleysi.

Leiðbeinandi: Haraldur Sigurður Þorsteinsson, sálfræðingur.

3. Næring og hreyfing

Fjallað er um hvernig næring og hreyfing styðja við heilsu, vellíðan og þyngdarstjórnun.

• Hvernig næring og hreyfing hafa áhrif á heilsu, vellíðan og þyngdarstjórnunarkerfi líkamans.

• Hvað einkennir heilsusamlegt samband við mat.

• Verkfæri til að skoða eigin venjur og finna raunhæf skref sem styðja við heilsu og vellíðan.

• Hugmyndir og ráð um hreyfingu sem tekur mið af getu, áhuga og aðstæðum hvers og eins.

Leiðbeinendur: Edda Ýr Guðmundsdóttir, næringarfræðingur og sjúkraþjálfari og Óla Kallý Magnúsdóttir, næringarfræðingur.

4. Sérhæfð offitumeðferð

Yfirlit yfir lyfjameðferðir og efnaskiptaaðgerðir við offitu. Skoðað er:

• Hvenær offitumeðferð á við.

• Hvernig inngripin virka inn í þyngdarstjórnun líkamans.

• Hvert skal leita ef talið er skynsamlegt að nýta offitumeðferð.

• Hvernig þarf að vinna með heilbrigðan lífsstíl samhliða inngripum.

• Hvernig eftirliti skuli háttað.

Leiðbeinendur: Íris Dröfn Björnsdóttir, hjúkrunarfræðingur og Sigrún Kristjánsdóttir, hjúkrunarfræðingur og ljósmóðir

Fyrirkomulag

Námskeiðið er annað hvort staðnámskeið eða fjarnámskeið:

• Staðnámskeið er haldið í Þönglabakka 1, 109 Reykjavík, 2. hæð (sami inngangur og Læknasetrið og Gáski).

• Fjarnámskeið er í gegnum Teams fjarfundakerfið og eru ætlaðir fólki á landsbyggðinni og þeim sem eiga ekki heimangengt. Fundarboð er sent út samdægurs.

• Tímalengd námskeiðisins er fjórar vikur

  • Hist er einu sinni í viku.

  • 90 mínútur í hvert skipti.

Kostnaður

• Þátttakendur greiða 17.206 krónur fyrir námskeiðið.

Nánari upplýsingar

• Umsjón með námskeiði: Heilsubrú Heilsugæslu höfuðborgarsvæðisins.

Hægt er að fá frekari upplýsingar eða tilkynna forföll með tölvupósti á heilsubru@heilsugaeslan.is.