Námskeiðið er fyrir foreldra barna 5 til 11 ára og eru í 1. til 6. bekk, sem eru þegar greind með ADHD eða sýna hamlandi ADHD einkenni samkvæmt skimun/frumgreiningu. Námskeiðið hentar ekki ef barnið er með alvarlegar eða fjölbreyttar fylgiraskanir.

Tilgangur námskeiðsins

• Fræða foreldra um áhrif ADHD á tilveru barna.

• Styðja foreldra við að tileinka sér uppeldisaðferðir sem henta börnum með ADHD og tengdar raskanir.

• Styðja foreldra til að skoða núverandi stöðu, gera áætlanir og framfylgja þeim til að taka á eða fyrirbyggja ýmsan vanda sem algengt er að upp komi.

Markmiðið er að foreldrar læri hagnýtar og sannreyndar aðferðir sem nýtast þeim til lengri tíma.

Á námskeiðinu verður farið yfir

• Tími 1 - Einkenni og áhrif ADHD á hegðun barna og samspil þessa við umhverfið. Orsakir óhlýðni og þróun samskipta í fjölskyldum. Grunnatriði atferlismótunar.

• Tími 2 - Uppeldisfærni og bjargráð foreldra, lykilatriði í uppeldi barna með ADHD, að veita æskilegri hegðun athygli og nota jákvæða athygli markvisst til kennslu.

• Tími 3 - Daglegt skipulag, rammi, rútína og reglur. Að gefa skýr fyrirmæli og ýta undir hlýðni, góða hegðun, sjálfstæði og sjálfsaga.

• Tími 4 - Kynning á mismunandi umbunarkerfum; notkun, fyrirkomulag og framkvæmd. Val markhegðunar og umbunar.

• Tími 5 - Viðurlög við óæskilegri hegðun, mismunandi leiðir. Að taka á hegðun utan heimilis, sjá erfiðleika fyrir og skipuleggja fyrirbyggjandi aðgerðir og viðbrögð.

• Tími 6 - Skipulag til framtíðar, hvað á að gera ef hegðun barns versnar, þarf einhverju að breyta í núverandi aðgerðum? Niðurstöður matslista, ráðgjöf, endurgjöf og útskrift.

Lögð er rík áhersla á umræður og virka þátttöku foreldra til að hámarka gagnsemi efnisins. Hver tími námskeiðsins byggir á þeim fyrri, svo mikilvægt er að sækja alla tíma. Mælt er með því að báðir foreldrar sæki námskeiðið.

Fyrirkomulag

Boðið er upp á stað og fjarnámskeið

• Tímalengd námskeiðisins er 6 vikur.

• Einu sinni í viku í tvær klukkustundir í senn.

• Foreldrar fylla út matslista í upphafi og lok námskeiðs.

• Unnin eru heimaverkefni milli tíma, sem rædd eru í kjölfarið og gefin er ráðgjöf um framhaldið.

• Einstaklingsráðgjöf er í boði eftir þörfum.

• Staðsetning: er haldið í Geðheilsumiðstöð barna, Vegmúla 3, 108 Reykjavík.

Kostnaður: Námskeiðið er gjaldfrjálst en verð vegna námskeiðsgagna er 4000 krónur.

Nánari upplýsingar

• Námskeiðið er haldið á vegum Geðheilsumiðstöðvar barna.

• Leiðbeinendur hverju sinni eru tveir fagaðilar sem eru sérfróðir um ADHD og skyldar raskanir og hafa staðgóða reynslu af vinnu með foreldrum og börnum.

• Nánari upplýsingar um skráningu á namskeid.gmb@heilsugaeslan.is