Ísland.is er upplýsingavefur þar sem notendur geta nálgast upplýsingar og þjónustu sem hið opinbera veitir. Á nýjum vef Heilsugæslu höfuðborgarsvæðisins (HH) eru upplýsingar settar fram á skipulegan hátt og á einföldu máli. Vefurinn er bæði á íslensku og ensku.

Heilsugæsla höfuðborgarsvæðisins rekur 15 heilsugæslustöðvar í öllum sveitarfélögum á höfuðborgarsvæðinu auk þess sem Heimahjúkrun HH þjónustar íbúa í Kópavogi, Garðabæ og Hafnarfirði. Þá rekur HH einnig þrjú svæðisbundin geðheilsuteymi sem sinna höfuðborgarsvæðinu, auk ýmissar annarrar svæðisbundinnar þjónustu.

Starfar einnig á landsvísu

Hluti af starfsstöðvum HH veitir þjónustu á landsvísu. Það á til dæmis við um fjögur stór geðheilsuteymi: Geðheilsumiðstöð barna, Geðheilsuteymi ADHD, Geðheilsuteymi taugaþroskaraskana og Heilaörvunarmiðstöð.

Þá þjóna sérhæfðar starfsstöðvar eins og Upplýsingamiðstöð HH, Samhæfingarmiðstöð krabbameinsskimana, Heilsubrú og Heilbrigðisskoðun innflytjenda einnig öllu landinu.

Auðvelt að finna upplýsingar

Á nýjum vef HH á Ísland.is verður almenningi gert auðveldara fyrir að finna upplýsingar um þjónustu stofnunarinnar, eins og aðra þjónustu ríkisins.