Endurgreiðsla VSK vegna verksmiðjuframleiddra íbúðarhúsa eða húseininga

Innflytjendur eða framleiðendur verksmiðjuframleiddra íbúðarhúsa og húseininga eiga rétt á endurgreiðslu virðisaukaskatts, sem nemur ákveðnu hlutfalli af heildarsöluverði hvers húss, allt eftir því á hvaða stigi húsið er afhent, að meðtöldum 24% virðisaukaskatti.

Lóðarhafi getur sótt um endurgreiðslu vegna vinnu á grunni og plötu slíkra húsa. Sjá nánar um endurgreiðslu VSK vegna íbúðarhúsnæðis

Hlutfall endurgreiðslu

Sé verksmiðjuframleitt hús eða húseining afhent óuppsett skal endurgreiðsla nema 1,85% af söluverði að meðtöldum virðisaukaskatti.

Sé hús afhent uppsett til kaupanda á grunni sem hann leggur til skal endurgreiðsla nema eftirfarandi hlutfalli af söluverði húss að meðtöldum virðisaukaskatti. Sé verksmiðjuframleitt hús afhent:

• fullgert: 2,65%

• tilbúið undir málningu og innréttingu: 3%

• afhent fokhelt: 2,15%

Endurgreiðslutímabil og afgreiðsla umsókna

Hvert endurgreiðslutímabil er tveir mánuðir. Endurgreiðslutímabil þeirra byggingaraðila sem gera upp virðisaukaskatt einu sinni á ári (ársskil) er þó almanaksárið. Umsókn skal berast ríkisskattstjóra í síðasta lagi 15. dag næsta mánaðar eftir að endurgreiðslutímabili lýkur.

Réttur til endurgreiðslu fellur niður ef beiðni um endurgreiðslu berst ríkisskattstjóra eftir að sex ár eru liðin frá því að réttur til endurgreiðslu stofnaðist.

Gögn með umsókn

Meðfylgjandi beiðni um endurgreiðslu skal vera:

• hreyfingalisti yfir seld hús eða húseiningar

• reikningar sem lagðir eru til grundvallar endurgreiðslu

• yfirlit yfir eign(ir) sem beiðni varðar.

Fylgi beiðni önnur fylgiskjöl skal gerð grein fyrir þeim í viðeigandi reit.

Varði umsókn fleiri en eina eign skal sundurliðun yfir staðsetningu og fastanúmer eigna fylgja umsókninni sem viðhengi.

Leiðbeiningar með umsókn

Orlofs- og frístundahúsnæði og húsnæði til nota í atvinnurekstri

Endurgreiðslur vegna verksmiðjuframleiddra íbúðarhúsa eða húseininga einskorðast við íbúðarhúsnæði. Endurgreiðslurnar taka ekki til:

• Orlofshúsa

• Sumarbústaða

• Bygginga fyrir starfsemi sem er undanþegin virðisaukaskatti.

Endurgreiðslur eru að sama skapi ekki veittar vegna húsnæðis til nota í skattskyldum atvinnurekstri í þeim tilvikum þegar eigandi húsnæðisins getur talið greiddan virðisaukaskatt til innskatts.

Ítarefni

Verksmiðjuframleitt íbúðarhúsnæði eða húseininga, endurgreiðslur – 2. mgr. 42. gr. laga nr. 50/1988, um virðisaukaskatt

Undanþegin starfsemi – 3. mgr. 2. gr. laga nr. 50/1988, um virðisaukaskatt

Innskattur – 15. og 16. gr. laga nr. 50/1988, um virðisaukaskatt

Reglugerð nr. 449/1990 - Reglugerð nr. 449/1990