Með frumvarpinu eru lögð til ný heildarlög um bókhald sem leysa af hólmi lög nr. 145/1994, um bókhald. Gildandi lög voru sett árið 1994 og hefur umhverfi bókhalds tekið verulegum breytingum frá þeim tíma. Færsla og varðveisla bókhalds fer nú að meginstefnu fram með rafrænum hætti, bókhaldsgögn eru í auknum mæli varðveitt í skýjaþjónustu og notkun rafrænna reikninga, sjálfvirkra gagnaskipta og þjónustu þriðja aðila hefur aukist.

Markmið frumvarpsins er að færa ákvæði bókhaldslaga til samræmis við breytta framkvæmd og tækniþróun á sviði bókhalds. Lagt er til að meginreglur um rafrænt bókhald, sem nú er að hluta til mælt fyrir um í reglugerð nr. 505/2013, verði lögfestar og að orðalag og uppbygging laganna taki mið af því að bókhald og bókhaldsgögn eru almennt á rafrænu formi. Jafnframt er lagt til að skýrðar verði reglur um ábyrgð á bókhaldi, færslu og leiðréttingu bókhaldsfærslna, bókhaldsgögn, varðveislu og aðgengi að þeim og gerð ársreikninga þeirra aðila sem ekki falla undir lög um ársreikninga.

Frumvarpið er í samræmi við áherslur í stefnuyfirlýsingu ríkisstjórnar Samfylkingar, Viðreisnar og Flokks fólksins um hagstæð rekstrarskilyrði fyrirtækja, stafvæðingu og aukna skilvirkni í samskiptum fyrirtækja og hins opinbera.

Frumvarpið felur ekki í sér innleiðingu EES-gerða en við undirbúning þess var horft til laga um bókhald í nágrannalöndum Íslands.

Hér með er óskað eftir umsögnum, athugasemdum og ábendingum um frumvarpsdrögin.