Með frumvarpinu er lagt til að lagaumgjörð skattalegs stuðnings við rannsóknar- og þróunarverkefni fyrirtækja verði endurskoðuð. Markmiðið er að skýra skilyrði stuðningsins, auka fyrirsjáanleika við framkvæmd og beina honum að rannsóknar- og þróunarstarfi fyrirtækja.

Helstu breytingar lúta að heiti og gildissviði laganna, skilgreiningum á rannsóknar- og þróunarverkefnum og skilyrðum fyrir staðfestingu þeirra. Þá eru lagðar til breytingar á umsóknarfrestum, gildistíma staðfestingar og málsmeðferð hjá Rannís, meðal annars með heimild til endurmats á synjun um að verkefni teljist rannsóknar- eða þróunarverkefni.

Jafnframt er lagt til að afmörkun styrkhæfs kostnaðar verði breytt. Áhersla er lögð á launakostnað vegna beinnar vinnu við verkefni, settar reglur um aðkeypta rannsóknar- og þróunarvinnu og heimilað fast álag á styrkhæfan launakostnað vegna annars kostnaðar við verkefni. Ekki eru lagðar til breytingar á hlutföllum skattfrádráttar eða heildarhámarki þess kostnaðar sem getur myndað stofn til skattfrádráttar.