Frumvarpið hefur að geyma tillögur að breytingum á skatta- og tollalöggjöf. Tillögurnar eru af ólíkum toga en eiga það sameiginlegt að miða að því að skýra og einfalda gildandi reglur, bæta framkvæmd þeirra og tryggja að löggjöfin endurspegli gildandi rétt og stjórnsýsluframkvæmd.

Breytingarnar eru jafnframt til þess fallnar að auka fyrirsjáanleika og samræmi við beitingu reglnanna, draga úr óþarfa álitaefnum og auðvelda bæði stjórnvöldum og þeim sem reglurnar taka til að átta sig á réttindum sínum og skyldum. Þá er með einstökum breytingum brugðist við annmörkum sem komið hafa í ljós í framkvæmd, lokað glufum í regluverkinu og tryggt að ákvæði laganna nái með skýrari hætti til þeirra tilvika sem þeim er ætlað að taka til.

Tillögurnar fela ýmist í sér efnislegar breytingar á skattalegri meðferð, skýrari afmörkun gildandi reglna eða lagfæringar á ákvæðum sem hafa orðið úrelt vegna síðari lagabreytinga eða breyttrar stjórnsýslu. Í heild miða þær að skýrara, einfaldara og samræmdara lagaumhverfi á þeim sviðum sem frumvarpið tekur til.