Lagt er til að innleiddar verði tvær EES-reglugerðir um kröfur til lánastofnana, önnur að hluta og hin í heild. Annarri gerðinni er ætlað að samræma reglur Evrópska efnahagssvæðisins við alþjóðlega staðla um tapþolsgetu kerfislega mikilvægra banka á alþjóðavísu (TLAC) og setur reglur til að koma í veg fyrir tvítalningu fjármagns. Hin gerðin mælir fyrir um tímabundna aðlögun á útreikningi eiginfjárkrafna vegna markaðsáhættu þannig að eiginfjárkröfur verði áfram sambærilegar því sem myndi leiða af gildandi reglum til ársloka 2029.

Sameiginlega EES-nefndin ákvað þann 30. apríl 2026, með ákvörðun nr. 140/2026, að taka upp í EES-samninginn reglugerð Evrópuþingsins og ráðsins (ESB) 2022/2036 frá 19. október 2022 um breytingu á reglugerð (ESB) nr. 575/2013 og tilskipun 2014/59/ESB að því er varðar varfærnismeðferð á kerfislega mikilvægum stofnunum á alþjóðavísu með margvíða skilastefnu og aðferðir fyrir óbeina áskrift að gerningum sem eru hæfir til að uppfylla lágmarkskröfu um eiginfjárgrunn og hæfar skuldbindingar. Gert er ráð fyrir að EES-nefndin muni innan skamms ákveða að taka upp í EES-samninginn framselda reglugerð framkvæmdastjórnarinnar (ESB) 2026/1221 frá 4. júní 2026 um breytingu á reglugerð Evrópuþingsins og ráðsins (ESB) nr. 575/2013 að því er varðar tímabundnar, markvissar ráðstafanir til rekstraraðstoðar og markvissa margfaldara fyrir útreikning á kröfum um eiginfjárgrunn stofnunar að því er varðar markaðsáhættu.

Í frumvarpsdrögunum er lagt til að 1. gr. c laga um fjármálafyrirtæki verði breytt til að ljá breytingum á CRR með reglugerðum (ESB) 2022/2036 og 2026/1221 lagagildi. Um er að ræða innleiðingu með tilvísun án nokkurra frávika eða breytinga enda er ekki svigrúm til staðar við innleiðinguna.

Reglugerð (ESB) 2022/2036

Reglugerð (ESB) 2022/2036 breytir bæði CRR og tilskipun 2014/59/ESB (BRRD-tilskipuninni) og er ætlað að tryggja að stórar alþjóðlegar bankasamstæður geti farið í gegnum skilameðferð án þess að raska fjármálastöðugleika og án opinberrar fjárhagsaðstoðar. Hún skýrir hvaða eigið fé og skuldbindingar innan slíkra samstæðna má telja fram til að uppfylla TLAC-kröfur og kemur þannig í veg fyrir að fjármagn til að mæta tapi sé talið oftar en einu sinni („daisy chain“-vandamálið), í samræmi við TLAC-staðla Alþjóðlega fjármálastöðugleikaráðsins (FSB). Með frumvarpinu eru breytingar á CRR innleiddar, en breytingar á BRRD-tilskipuninni verða innleiddar síðar með breytingu á reglugerð nr. 700/2024, sem sett er á grundvelli laga nr. 70/2020.

Reglugerð (ESB) 2026/1221

Með CRR III-reglugerðinni (ESB) 2024/1623 voru reglur um eiginfjárkröfur vegna markaðsáhættu endurskoðaðar til samræmis við Basel III-staðalinn í því skyni að gera kröfurnar áhættunæmari og draga úr mun á mati lánastofnana á markaðsáhættu. Gildistöku tiltekinna breytinga var frestað með framseldum reglugerðum (ESB) 2024/2795 og (ESB) 2025/1496, fyrst til 1. janúar 2026 og síðan til 1. janúar 2027, vegna tafa á hliðstæðum breytingum utan ESB, einkum í Bandaríkjunum og Bretlandi, til að skerða ekki samkeppnisstöðu lánastofnana á EES-svæðinu. Reglugerð (ESB) 2026/1221 felur ekki í sér frekari frestun heldur mælir fyrir um tímabundna aðlögun á útreikningi eiginfjárkrafna vegna markaðsáhættu þannig að þær verði áfram sambærilegar því sem leiðir af gildandi reglum til ársloka 2029, enda hafa hliðstæðar breytingar utan ESB enn tafist.