Löggjöf um skilameðferð lánastofnana og verðbréfafyrirtækja og innstæðutryggingar og tryggingakerfi fyrir fjárfesta er nú til endurskoðunar m.a. með það að markmiði að auka skilvirkni og tryggingarvernd vegna tiltekinna lífsviðburða.

Gert er ráð fyrir að löggjöfinni verði breytt þannig að:

a. Kveðið verði skýrar á um heimildir Tryggingarsjóðs vegna fjármálafyrirtækja (TvF) til lántöku,

b. nánar verði fjallað um upplýsingagjöf til TvF af hálfu þeirra fyrirtækja sem taka við innlánum,

c. skýrt verði að heildsöluinnlán geti talist til tryggingarhæfra innstæðna,

d. frestur Fjármálaeftirlitsins til að gefa út álit um getu aðildarfyrirtækis til að inna af hendi tryggða innstæðu verði styttur,

e. tryggingarvernd verði aukin fyrir tilteknar innstæður sem tímabundið nema háum fjárhæðum vegna atvika á borð við útgreiðslu örorkubóta, arfskipti, fasteignaviðskipti, hjónaskilnað eða sambærilegar aðstæður.

Að auki er um að ræða innleiðingu tveggja EES-gerða. Reglugerð (ESB) nr. 2023/662 og reglugerð (ESB) nr. 2024/895 breyta reglugerð (ESB) nr. 2015/63 sem innleidd er með tilvísunaraðferð í lögum um skilameðferð lánastofnana og verðbréfafyrirtækja. Reglugerðirnar mæla fyrir um breytingu á útreikningum varðandi framlög í skilasjóð. Skilasjóður hefur verið fullfjármagnaður frá stofnun og er ekki gert ráð fyrir breytingu á því.