Landsréttur hefur frá því að hann tók til starfa árið 2018 haft aðsetur utan Reykjavíkur á grundvelli bráðabirgðaheimildar, þótt í lögum um dómstóla sé kveðið á um aðsetur hans í Reykjavík. Heimildin rennur út 1. janúar 2027. Með frumvarpinu er lagt til að lagafyrirmæli um aðsetur Landsréttar í Reykjavík verði felld brott. Ekki verði því lengur mælt fyrir um í lögum í hvaða sveitarfélagi dómstóllinn hafi aðsetur.

Jafnframt er lagt til að skýrt verði kveðið á um heimild til að setja héraðsdómara í tilteknum tilvikum þótt þeir hafi náð 70 ára aldri, til samræmis við hliðstæð ákvæði um Hæstarétt og Landsrétt. Þá verði heimilt að skipa sama mann sem aðalmann við Endurupptökudóm tvisvar í stað einu sinni.